Fotofakt: Toshkent aeroportida “terrorchilar” qo‘lga olindi

Toshkent sharqiy aeroportida O‘zbekiston Respublikasi Milliy gvardiyasi  tomonidan samolyotda garovga olinganlarni ozod qilish, qurollangan terrorchilarni zararsizlantirish bo‘yicha aksilterror operatsiyasi, shuningdek, garovdagi fuqarolarni ozod qilishga qaratilgan amaliy taktik o‘quv mashg‘uloti o‘tkazildi. Bu haqda Milliy gvardiya matbuot xizmati xabar berdi. 

Mashg‘ulotda harbiy xizmatchilar fuqarolarni ozod qilish maqsadida terrorchilar o‘rnashib olgan samolyotga turli jangovor usullarda qo‘qqisdan zarba berish va ularni yakson qilish harakatlarini amalga oshirgan. 

O‘quv mashg‘uloti davomida bo‘linmalarning hududga joylashishi, kuzatuv punktini jihozlash, razvedka ishlarini o‘tkazish, terrorchilar bilan muzokara olib borish, yangi usul va uslublardan foydalangan holda jangovar juftlik tartibida taktik manyovrlarni amalga oshirish, hamkorlikdagi kuchlar bilan birgalikda qo‘yilgan vazifani bajarish bo‘yicha mashqlar ko‘rsatilgan.