Finlyandiyalik murabbiy ichimlik mojarosi sabab Olimpiadadan chetlashtirildi

Finlyandiyalik chang‘i sporti murabbiysi Igor Medved alkogol bilan bog‘liq mojaro tufayli 2026 yilgi qishki Olimpiya o‘yinlaridan chetlashtirildi. Bu haqda “Aftonbladet” nashri xabar berdi.

Qayd etilishicha, murabbiy musobaqalar davomida mast holda bo‘lgan va bu sanksiyalar qo‘llanilishiga olib kelgan.  Mojaro sabab musobaqani tark etganidan so‘ng finlyandiyalik sportchilar o‘yinlarning qolgan qismida murabbiy yordamisiz qolgan.

“Medved uyiga qaytdi. Bu alkogol bilan bog‘liq muammolar tufayli yuz berdi. Biz qoidabuzarliklarga juda jiddiy qaraymiz va zudlik bilan choralar ko‘ramiz”, deydi Finlyandiya Olimpiya qo‘mitasining elita sporti bo‘limi rahbari Yanne Xanninen.

Murabbiy esa o‘z harakatlari uchun uzr so‘radi.

“Men xato qildim va bundan chuqur afsusdaman. Butun Finlyandiya jamoasi, sportchilar va muxlislardan uzr so‘ramoqchiman. Jamoaga tinchlik va xotirjamlik tilayman, shunda ular Olimpiadaga e’tibor qaratishlari mumkin”, dedi chetlatilgan murabbiy.

Eslatib o‘tamiz, avvalroq ukrainalik skeletonchi Vladislav Geraskevich Rossiya bosqini paytida halok bo‘lgan ukrainaliklarning suratlari aks ettirilgan dubulg‘adan foydalangani uchun musobaqalardan chetlashtirilgandi.