Fermerlarga bir qator imtiyozlar berildi

O‘zbekistonda fermerlarga bir qator imtiyozlar berilmoqda. Bu 28 mart kuni qabul qilingan “Qishloq xo‘jaligida yerdan foydalanish samaradorligini oshirish va mahsulot yetishtirish hajmini ko‘paytirish bo‘yicha qo‘shimcha chora-tadbirlar to‘g‘risida”gi Prezident qarorida belgilangan.

Qarorga ko‘ra, 2025 yil hosilidan boshlab har yili paxtadan 50 sentner/gektar, g‘alladan 80 sentner/gektardan yuqori hosil olganini soliq hisobotlarida aks ettirgan fermer xo‘jaliklari va boshqa qishloq xo‘jaligi korxonalariga kelgusi yilda:

• ijaraga olingan jami yer maydonining 25 foiziga almashlab ekish usulida chorva uchun ozuqa, sabzavot, poliz, kartoshka, moyli va dukkakli ekinlarni ekish (joylashtirish) kafolatlanadi;
• O‘zbekiston fermerlari kengashiga a’zolik badali paxta xomashyosi bo‘yicha birjada e’lon qilinadigan boshlang‘ich narxdan va donning shakllangan o‘rtacha narxidan 0,3 foiz miqdorida belgilanadi;
• O‘zbekiston Respublikasi Prezidentining 2025 yil 3 fevraldagi PF-18-son Farmonining 15-bandiga muvofiq yer solig‘ini hisoblashda bazaviy stavkaga nisbatan mutanosib ravishda uch karragacha kamaytiruvchi koeffitsiyentlar qo‘llanadi.

Bundan tashqari, qishloq xo‘jaligi kooperativlariga a’zo bo‘lgan fermer xo‘jaliklarining 50 foizidan oshmagan qismiga paxta yetishtirish uchun Qishloq xo‘jaligini davlat tomonidan qo‘llab-quvvatlash jamg‘armasining resurslari hisobidan 50 foizlik mol-mulk garovi, xususan, yerga ijara huquqi g‘arovi bilan imtiyozli kredit ajratishga ruxsat etiladi, bunda ushbu kredit paxta xomashyosining e’lon qilingan boshlang‘ich narxidan kelib chiqib ajratiladi.

Shu bilan birga, qishloq xo‘jaligi kooperativlariga a’zo bo‘lgan fermer xo‘jaliklari yetishtirgan paxta xomashyosini to‘g‘ridan to‘g‘ri xarid qilishga ruxsat beriladi, bunda to‘g‘ridan to‘g‘ri shartnomalar “O‘zbekiston respublika tovar-xomashyo birjasi” AJning axborot portalida tuzilishi va ular bo‘yicha to‘lovlar birjaning hisob-kitob-kliring operatsiyalarini o‘tkazish (to‘lov hujjatlariga muvofiq pul o‘tkazish) qoidalari asosida amalga oshirilishi belgilandi.

Hujjatga ko‘ra, barcha turdagi qishloq xo‘jaligiga mo‘ljallangan yerlarni ijaraga berishda 2025 yil 11 martdan quyidagi tartiblar joriy etiladi:

• elektron onlayn auksion savdosini o‘tkazish to‘g‘risidagi xabarnomani e’lon qilish muddati 15 kundan 5 kunga, takroriy savdolarda – 5 kundan 1 kunga qisqartiriladi;
• takroriy savdolarda faqat bir nafar talabgordan ariza kelib tushgan taqdirda, unga ushbu savdoda e’lon qilingan narxda lotni ixtiyoriy sotib olish taklif etiladi;
• har takroriy savdoda lot narxi 10 foizdan bosqichma-bosqich boshlang‘ich narxning 20 foiziga tushganiga qadar pasaytiriladi.

Bugun, 1 aprel kunidan auksion savdolarida yer uchastkasiga ijara huquqini olish uchun to‘lovlarni bo‘lib-bo‘lib to‘lash va to‘lov to‘liq to‘langanda chegirma berish tartibi bekor qilinadi, ushbu to‘lovlar 15 ish kuni ichida to‘liq to‘lanishi shartligi belgilandi.

2025-2026 yillarda auksion savdolariga chiqariladigan qishloq xo‘jaligiga mo‘ljallangan yerlar jami maydonining o‘rtacha 10–20 foizi chorva uchun ozuqa ekinlarini ekish sharti bilan savdoga chiqariladi.

Eslatib o‘tamiz, 19 mart kuni Prezident Shavkat Mirziyoyevning kichik va o‘rta biznes vakillari bilan sohaning iqtisodiyotdagi o‘rnini oshirish va rivojlanishini yangi bosqichga olib chiqish masalalariga bag‘ishlangan uchrashuvida fermerlar soliqdan qarzini vaqtida to‘lay olmagani uchun shu paytgacha yig‘ilib qolgan 1 trillion so‘mlik penyani undirishdan voz kechilishini ma’lum qilingandi.