Federal sud Trampning “Ozodlik radiosi”ni yopish harakatini to‘xtatdi

25 mart kuni Kolumbiya okrugi sudi sudyasi Roys Charlz Lambert AQSH Prezidenti Donald Trampning “Ozodlik radiosi”ni yopishga bo‘lgan harakatini vaqtincha to‘xtatdi. Bu haqda “The New York Times” xabar berdi.

Sudyaning ushbu vaqtinchalik taqiqlov qarori federal mablag‘ bilan moliyalashtiriladigan bu radiostansiyani ochiq holda qolishiga imkon beradi.
Sudya Lambertning ta’kidlashicha, Kongress tomonidan bu axborot agentligiga fikr va ifoda erkinligini targ‘ib qilish vazifasi yuklatilgan bo‘lib, uni “deyarli hech qanday tushuntirishsiz bitta jumla bilan” yo‘qqa chiqarish mumkin emas.

Lambert o‘zining bu gapi bilan 15 mart kuni Tramp ma’muriyati tomonidan “Radio Free Europe/Radio Liberty” (RFE/RL)ga yuborilgan xatga ishora qilgan. Bu xatda hukumatning ustuvor yo‘nalishlari o‘zgargani sababli radiostansiyaga endi ehtiyoj yo‘qligi bildirilgan edi. Xatda boshqa tushuntirish berilmagan, faqat federal agentliklarni yopish bo‘yicha Trampning ko‘rsatmalariga murojaat qilingan.

Trampning AQSH Global Media agentligini demontaj qilish bo‘yicha harakati bo‘yicha boshqa ko‘plab da’volar ham kutilmoqda.

O‘tgan hafta “Amerika ovozi”ning jurnalistlari bir nechta kasaba uyushmalari va “Chegara bilmas muxbirlar” matbuot erkinligi guruhi bilan birga “Amerika ovozi”ning yopilishini noqonuniy va Konstitutsiyaga zid ekani bo‘yicha sudga murojaat qilgandi.

“Amerika ovozi”ni o‘chirishning uzoq muddatli oqibatlari global miqyosda aks etadi va Qo‘shma Shtatlarning ta’siri va axloqiy obro‘sini pasaytiradi”, dedi “Amerika ovozi”ning bosh milliy muxbiri Stiv Xerman 24 mart kuni bo‘lib o‘tgan matbuot anjumanida.

Mazkur ish bo‘yicha sudya ertaga, 28 mart kuni “Amerika ovozi”ning dalillarini eshitadi.