Федерал суд Трампнинг “Озодлик радиоси”ни ёпиш ҳаракатини тўхтатди

25 март куни Колумбия округи суди судьяси Ройс Чарльз Ламберт АҚШ Президенти Дональд Трампнинг “Озодлик радиоси”ни ёпишга бўлган ҳаракатини вақтинча тўхтатди. Бу ҳақда “The New York Times” хабар берди.

Судьянинг ушбу вақтинчалик тақиқлов қарори федерал маблағ билан молиялаштириладиган бу радиостанцияни очиқ ҳолда қолишига имкон беради.
Судья Ламбертнинг таъкидлашича, Конгресс томонидан бу ахборот агентлигига фикр ва ифода эркинлигини тарғиб қилиш вазифаси юклатилган бўлиб, уни “деярли ҳеч қандай тушунтиришсиз битта жумла билан” йўққа чиқариш мумкин эмас.

Ламберт ўзининг бу гапи билан 15 март куни Трамп маъмурияти томонидан “Radio Free Europe/Radio Liberty” (RFE/RL)га юборилган хатга ишора қилган. Бу хатда ҳукуматнинг устувор йўналишлари ўзгаргани сабабли радиостанцияга энди эҳтиёж йўқлиги билдирилган эди. Хатда бошқа тушунтириш берилмаган, фақат федерал агентликларни ёпиш бўйича Трампнинг кўрсатмаларига мурожаат қилинган.

Трампнинг АҚШ Глобал Медиа агентлигини демонтаж қилиш бўйича ҳаракати бўйича бошқа кўплаб даъволар ҳам кутилмоқда.

Ўтган ҳафта “Америка овози”нинг журналистлари бир нечта касаба уюшмалари ва “Чегара билмас мухбирлар” матбуот эркинлиги гуруҳи билан бирга “Америка овози”нинг ёпилишини ноқонуний ва Конституцияга зид экани бўйича судга мурожаат қилганди.

“Америка овози”ни ўчиришнинг узоқ муддатли оқибатлари глобал миқёсда акс этади ва Қўшма Штатларнинг таъсири ва ахлоқий обрўсини пасайтиради”, деди “Америка овози”нинг бош миллий мухбири Стив Херман 24 март куни бўлиб ўтган матбуот анжуманида.

Мазкур иш бўйича судья эртага, 28 март куни “Америка овози”нинг далилларини эшитади.