Fayzullayevga SSKA sardorining yonidan joy ajratilgan – Qahhor Mo‘minov

“ProSports Management” agentligining Osiyo bo‘limi boshlig‘i Qahhor Mo‘minov 20 yoshli o‘zbekistonlik vinger Abbosbek Fayzullayevning SSKA safidagi omadli debyuti haqida fikr bildirdi.

“Abbosdan yaxshi startni kutgan edik desam, yolg‘on gapirgan bo‘laman. Abbos shu paytgacha o‘z imkoniyatidan oqilona foydalanib kelgan. Eng muhimi, Abbosni Moskvada juda iliq kutib olishdi. Akinfeyev va boshqa yetakchilar unga yordam berdi. Klubdagilarning barchasi Fayzullayevga yaxshi turtki bo‘ldi. Aytgancha, Fayzullayevga kiyinish xonasida jamoa sardorining yonidan joy ajratilgan. Bu esa sharafdir”, deydi Mo‘minov.

Joriy mavsum o‘zbekistonlik futbolchi SSKA safida umumiy 12 ta o‘yinda maydonga tushib, 1 ta gol urdi va 3 ta golli uzatmani amalga oshirdi.

Ma’lumot uchun, Fayzullayevning Moskva klubi bilan shartnomasi 2026 yilga qadar mo‘ljallangan. “Transfermarkt”ga ko‘ra, 20 yoshli futbolchining qiymati 2 million yevroni tashkil etadi.