Farg‘onada yana katta yong‘in sodir bo‘ldi (video)

Farg‘ona viloyati Uchko‘prik tumanida qurilishi tugallanmagan sex yonib ketdi. Bu haqda viloyat Favqulodda vaziyatlar boshqarmasi matbuot xizmati xabar berdi. 

Ma’lum qilinishicha, bugun, 19 iyun kuni soat 12:42 da Uchko‘prik tumanidagi “Avilon Qo‘qon tekstil” MCHJga qarashli kalava va rangli ip ishlab chiqaruvchi sex binosida yong‘in kelib chiqqan. Binoning 150 kvadrat/metr tom qismi, operator va qorovul xonasi yonib zararlangan. 

Yong‘in-qutqaruv ekipaji hodisa joyiga 12:45 da yetib borgan hamda yong‘in 12:48 da o‘rab olinib, 13:02 da o‘chirilgan. Yong‘indan sex binosining 2000 kvadrat/metr maydoni saqlab qolingan. 

Hozirda yong‘in sababi va zarar miqdori aniqlanayotgani xabar qilingan. Hodisa oqibatida jabrlanganlar va halok bo‘lganlar yo‘qligi aytilmoqda. 

Eslatib o‘tamiz, avvalroq Qo‘qon shahridagi bozor yonib ketgandi. Yong‘in 4 soat ichida o‘chirilgandi. Keyinroq holat yuzasidan jinoyat ishi qo‘zg‘atildi. Shuningdek, bozorda yonib ketgan do‘konlar tez orada qayta qurib berilishi ma’lum qilindi.