Farg‘onada davlat yerini 650 ming dollarga sotayotgan shaxs ushlandi

Farg‘ona viloyatida davlat zaxirasidagi 2,5 gektar yer maydonini 650 ming AQSH dollariga sotishga kelishib, oldindan 100 ming AQSH dollarini olgan vaqtida ashyoviy dalillar bilan ushlandi. Bu haqda Ichki ishlar vazirligi matbuot xizmati xabar berdi.

Qayd etilishicha, Farg‘ona viloyatida olib borilgan “Tozalash” kompleks tezkor-profilaktik tadbirlari doirasida 86 ta jinoiy, 853 ta ma’muriy – jami 939 ta holat aniqlangan. 98 nafar shaxslar jinoiy javobgarlikka tortilgan bo‘lsa, 889 nafar shaxslarga nisbatan ma’muriy choralar ko‘rilgan. 49 ta jinoyat fosh etilib, 31 nafar qidiruvdagi shaxslar ushlangan. 1 167 nafar shaxs rasmiy ogohlantirilgan.

Qo‘lga olingan jinoiy guruh va shaxslardan 3 kg 376 gr giyohvandlik vositalari, 2 331 dona kuchli ta’sir qiluvchi dori vositalari, 17 ta noqonuniy qurol, 344 dona tig‘li buyumlar olinib, ashyoviy dalil sifatida rasmiylashtirilgan.

Olib borilgan tadbirlar davomida Rishton tumanida yashovchi 1995 yilda tug‘ilgan shaxs qo‘lga olingan. U erkaklar kiyim do‘koniga kirib, sotib olmoqchi bo‘lgan mahsulotlarini nasiyaga berishni talab qilgan. Sotuvchi bunga ko‘nmagach, uni sha’ni va qadr-qimmatini kamsituvchi so‘zlar bilan haqoratlab, qo‘l-oyoqlari bilan urib do‘pposlagan. Oqibatda do‘kon sotuvchisi jarohatlangan. Holat yuzasidan Jinoyat kodeksining 277-moddasi (Bezorilik) 3-qismi “a” bandi bilan jinoyat ishi qo‘zg‘atilib, gumonlanuvchiga nisbatan qamoqqa olish tarzida ehtiyot chorasi qo‘llanilgan.

Farg‘ona tumanida o‘tkazilgan “nazorat ostida olish” tadbiri davomida esa maxsus xaridorga 2 300 AQSH dollari evaziga 500 gramm giyohvandlik moddasini sotayotgan shaxs qo‘lga olingan. Uning yashash xonadonida keyinchalik sotish maqsadida saqlab kelinayotgan giyohvandlik moddasi olinib, kimyoviy ekspertizaning xulosasiga ko‘ra, sof og‘irligi 1 kg 470 gr “marixuana” giyohvandlik vositasi ekani aniqlangan.

Oltiariq tumanida olib borilgan tezkor tadbir davomida noqonuniy elektr energiyasidan foydalanish holatiga chek qo‘yilgan. “Qo‘rg‘oncha” mahallasi hududida joylashgan bog‘dorchilik fermer xo‘jaligi tarmoqqa ulanib, elektr energiyasidan noqonuniy foydalangan holda davlatga 1 mlrd 897 mln so‘m miqdorda zarar yetkazgani aniqlanib, tegishli hujjatlar rasmiylashtirilgan.

Yer resurslarini talon-toroj qilish holatlarini oldini olish yuzasidan Uchko‘prik tumanida o‘tkazilgan tezkor tadbir davomida 1968 yilda tug‘ilgan shaxs qo‘lga olingan.

U “Kenagas“ mahallasi hududida joylashgan 90 sotix qismi noturar va 1 gektar 60 sotixi davlat zaxirasida bo‘lgan jami 2,5 gektar yer maydonini 650 ming AQSH dollariga sotishga kelishib, oldindan 100 ming AQSH dollarini olgan vaqtida ashyoviy dalillar bilan ushlangan.

Bildirilishicha, aniqlangan holatlar bo‘yicha jinoyat ishlari qo‘zg‘atilib, tergov harakatlari olib borilmoqda.

Eslatib o‘tamiz, 5-7 fevral kunlari Davlat xavfsizlik xizmati hamda Ichki ishlar vazirligi tuzilmalari tomonidan O‘zbekiston bo‘ylab o‘tkazilgan “Oriat” va “Qoradori” keng ko‘lamli tadbirlarida 339 nafar shaxsga nisbatan 269 ta jinoyat ishi qo‘zg‘atilib, 119 nafar shaxs ma’muriy javobgarlikka tortilgandi hamda 53 nafar qidiruvdagi shaxs ushlangandi.