Fantastik summa. AQSH fevraldan beri Ukrainaga qancha pullik yordam qilgani ochiqlandi

Rossiyaning Ukrainaga qarshi qurolli bosqini boshlanganidan beri Amerikaning Kiyevga ko‘rsatgan harbiy yordamining umumiy miqdori 16,8 milliard dollarga yetdi. Bu haqda AQSH Mudofaa vaziri Lloyd Ostin bugun, 12 oktyabr kuni Bryusselda G‘arb davlatlari tomonidan harbiy yordamni muvofiqlashtirish bo‘yicha tuzilgan guruh yig‘ilishi ma’lum qildi. 

“Prezident [Jo] Bayden boshchiligida AQSHning Ukrainaga xavfsizlik bo‘yicha yordami hozirda 16,8 milliard dollarga yetganini e’lon qilishdan mamnunman va men o‘z yordam paketlarini taqdim etishda davom etayotgan hurmatli ittifoqdoshlarimiz va hamkorlarimizdan juda minnatdorman”, deydi u. 

Ostin, shuningdek, Rossiyaning Ukrainadagi nishonlarga bergan so‘nggi raketa zarbalari G‘arb davlatlarining Kiyevga keyingi yordam ko‘rsatish istagini yanada kuchaytirganini ta’kidladi.  

“Bizning qat’iyatimiz va pozitsiyamiz mustahkamlandi. Ushbu aloqa guruhi ahil va qat’iyatli bo‘lib qolmoqda. Biz Ukrainaning mudofaa qobiliyatini bugungi kunning dolzarb ehtiyojlari bilan bog‘liq holda, shuningdek, uzoq muddatda mustahkamlashda davom etamiz”, deya qo‘shimcha qildi Ostin. 

Harbiy-sanoat ishlab chiqarishiga investitsiyalar

Ostinga ko‘ra, Vashington Ukrainaga yordam berishni davom ettirish uchun harbiy ishlab chiqarishga sarmoya kiritgan. 

“Biz Kiyevning mudofaa ehtiyojlarini o‘zimizniki kabi qondirish uchun harbiy-sanoat bazasiga sarmoyani oshirdik”, deydi u.  

Ostinning qo‘shimcha qilishicha, Qo‘shma Shtatlar va uning Yevropa Ittifoqi va NATOdagi ittifoqchilari Ukraina hududiga berilgan zarbalardan so‘ng unga yanada ko‘proq yordam ko‘rsatishga bel bog‘lagan. 

“Biz ushbu yuqori samarali yordamni keyingi oylar va yillar davomida ishlab chiqaramiz va yetkazib beramiz”, deydi Mudofaa vazirligi rahbari.  

Uning qayd etishicha, ikki hafta oldin Qo‘shma Shtatlar Ukrainaga yana 1,1 milliard dollarlik harbiy yordam paketini e’lon qildi, bu paketga 18 ta qo‘shimcha HIMARS yalpi raketa tizimlari, yuzlab transport vositalari, o‘nlab radarlar, uchuvchisiz havo vositalariga qarshi tizimlar va boshqalar kiradi