Eron gipertovushli raketani muvaffaqiyatli sinovdan o‘tkazdi

Eron yangi gipertovushli raketani muvaffaqiyatli sinovdan o‘tkazdi. Bu haqda bugun, 29 may kuni Eron Aerokosmik kuchlari qo‘mondoni general Amir Ali Hojizodaga tayanib, “Tasnim” xabar berdi.  

“Yangi gipertovushli raketa muvaffaqiyatli sinovdan o‘tkazildi va tez orada taqdim etiladi. Ushbu raketa dushmanning raketaga qarshi mudofaa tizimlarini chetlab o‘ta oladi. Bu Eron raketa fanida muhim yutuqdir”, deydi Hojizoda. 

Uning ta’kidlashicha, yangi raketa soatiga kamida 14-15 ming kilometr tezlikka ega bo‘ladi, shuningdek, atmosfera ichida ham, tashqarisida ham manyovr qila oladi.

Eslatib o‘tamiz, joriy yilning 25 may kuni Eron Mudofaa vazirligi 2000 km masofaga uchadigan yangi “Xaybar” ballistik raketasini taqdim etgandi. Raketa Xorramshahr turkumidagi eng so‘nggisi bo‘lib, og‘irligi 1,5 tonnagacha bo‘lgan jangovar kallakni ko‘tara olishi aytildi. Raketaning boshqaruv tizimi atmosferaga kirgandan so‘ng o‘chirib qo‘yilib, elektron urush tizimlariga qarshi immunitetga ega bo‘lishi ta’kidlandi. Raketaning tezligi atmosferadan tashqarida 19600 km/soat va atmosferada taxminan 9800 km/soatga yetdi.