Erdo‘g‘an Qora dengizda Ukraina qilgan hujumni qoraladi

Turkiya Prezidenti Rajab Toyib Erdo‘g‘an mamlakat shimoliy qirg‘oqlari yaqinida Rossiyaning “soya floti”ga mansub tankerlar nishonga olinganidan so‘ng, Qora dengizdagi tijorat kemalariga uyushtirilgan hujumlarni “qabul qilib bo‘lmas” deb atadi. Prezidentning aytishicha, bu voqealar mintaqadagi yuk tashish xavfsizligiga bo‘lgan tahdidning kuchayib borayotganini ko‘rsatmoqda. 

Ma’lum qilinishicha, kecha, 1 dekabr kuni Erdo‘g‘an jurnalistlarga ushbu hujumlarni hech qanday sharoitda oqlab bo‘lmasligini aytib, barcha tegishli tomonlarga zarur ogohlantirishlar berilishini ta’kidladi. Prezidentning so‘zlariga ko‘ra, Rossiya va Ukraina o‘rtasidagi urush Qora dengizdagi kemalar xavfsizligiga bevosita tahdid sola boshlagan.

“Juma kuni bizning eksklyuziv iqtisodiy zonamizga yaqin kemalarning nishonga olinishi vaziyatning xavotirli darajada kuchayganini ko‘rsatmoqda,” dedi Erdo‘g‘an.

Avvalroq Turkiya Tashqi ishlar vazirligi ham neft tankerlariga qilingan hujumlardan xavotir bildirgan edi. Vazirlik vakili Onju Kecheli Anqara Qora dengizda “urush kengayishining oldini olish” va mintaqadagi “Turkiya iqtisodiy manfaatlariga zarar yetkazmaslik” maqsadida manfaatdor tomonlar bilan muloqotni davom ettirayotganini ma’lum qilgan. Bayonotda hujum uchun javobgarlikni o‘z zimmasiga olgan Ukraina bevosita qoralanmagan.

Ma’lumot uchun, Rossiyaning “soya floti” tarkibiga kiruvchi “Kairos” va “Virat” tankerlariga 28 noyabr kuni kechqurun Turkiya qirg‘oqlari yaqinida hujum uyushtirilgan. Ukraina OAV ma’lumotlariga ko‘ra, ular Ukraina Xavfsizlik xizmati tomonidan boshqariladigan Sea Baby dengiz dronlari tomonidan urilgan. Hujum tankerlar yuksiz holda, Novorossiysk portiga yo‘l olayotgan vaqtda yuz bergan.

Eslatib o‘tamiz, Qozog‘iston 30 noyabr kuni Ukrainaga Qora dengizda joylashgan va jahon neftining 1 foizidan ortig‘ini qayta ishlaydigan Kaspiy neft quvuri konsorsiumi (CPC) terminaliga hujumlarni to‘xtatishni iltimos qilgandi.