Erdo‘g‘an Isroildan Al-Aqsoga hurmat ko‘rsatishni talab qildi

Al-Aqso masjidiga hurmat ko‘rsatilmasa, Isroilga nisbatan boshlangan qurolli hujum oxirgisi bo‘lishiga hech kim kafolat bermaydi. Bu haqda Turkiya Respublikasi Prezidenti Rajab Toyib Erdo‘g‘an bugun, 11 oktyabr kuni Buyuk Millat Majlisi (parlament) yig‘ilishidagi nutqida so‘z ochdi. 

“Biz davlat va hukumat rahbarlari, jumladan Falastin va Isroil davlat rahbarlari darajasida sakkiz marta telefon orqali muloqot qildik. Biz janob Mahmud Abbos (Falastin ozodlik tashkiloti raisi) va janob Isxak Gersogga (Isroil Prezidenti) xotirjamlik, sog‘lom fikr va davlatning donoligi bilan harakat qilishni maslahat berdik. Kecha kechqurun biz bu masalani Rossiya Prezidenti janob Putin va Birlashgan Millatlar Tashkiloti Bosh kotibi janob Guterrish bilan muhokama qildik. Biz ziddiyatlarning chuqurlashishi va tarqalishining oldini olish uchun zarur yordam ko‘rsatishga tayyor ekanimizni bildirdik. Turkiya sifatida mintaqamizni bu girdobdan tezda olib chiqish uchun vositachilik va adolatli arbitraj kabi qo‘limizdan kelganini qilishga tayyormiz. Umid qilamanki, bu munosabatimizni oxirigacha saqlab qolamiz”, deydi Erdo‘g‘an. 

Prezident Erdo‘g‘an, barcha mintaqa davlatlari bilan yaqinda o‘rnatgan yaqin muloqotini tinchlik o‘rnatish uchun qo‘llashini bildirgan. 

“Biz na G‘azoda, ham Isroilda, ham Suriyada, ham Ukrainada bolalar, tinch aholi, begunoh odamlar o‘lmasligini yoki ko‘proq qon to‘kilmasligini istaymiz. Bu so‘nggi voqealar bilan biz “Dunyo beshdan katta” degan so‘zimiz naqadar o‘rinli ekanini yana bir bor ko‘rdik. Umid qilamizki, bundan buyon bu e’tirozimizni yanada balandroq ovozda aytamiz”, deydi u.

Uning aytishicha, mintaqada doimiy osoyishtalik va tinchlik faqat qonuniyligi Birlashgan Millatlar Tashkiloti rezolyutsiyalariga asoslangan, 1967 yildagi chegaralari va geografik yaxlitligi, poytaxti Sharqiy Quddus bo‘lgan, butun dunyo tomonidan tan olingan mustaqil Falastin davlatining barpo etilishi bilan kelishi mumkin.

“Biz uchta samoviy dinning muqaddas maskanlarini o‘zida mujassam etgan Quddusning hayotiga, Masjidul Aqso joylashgan Haram ash-Sharif maqomiga hurmat ko‘rsatmaydigan hech qanday qadam yoki chorani qabul qilganimiz yo‘q va qabul qilmaymiz”.

U faqat shu yo‘l bilan Isroilning davlat sifatida mavjudligini davom ettirishi va fuqarolarining xavfsizligini kafolatlashi mumkinligini ta’kidlab o‘tgan. 

“Aks holda, o‘tgan shanbadan buyon sodir bo‘lgan voqealar oxirgisi bo‘lmaydi va bundan ham kattaroq fojialar kelishi muqarrar. Biz Isroil, Falastin yoki mintaqamizning bunday ayovsiz doiraga tortilishini hech qachon istamaymiz”, deydi Prezident.