Endrik va Gulerning “Real”dagi taqdiri nima bo‘ladi? Anchelotti javob berdi

“Real”ning ikki futbolchisi braziliyalik Endrik va turkiyalik Arda Guler qishki transfer oynasida jamoa safini tark etmasligi aniq bo‘ldi. Bu haqda jamoa ustozi Karlo Anchelotti As nashriga bergan intervyusida aytdi.

“Endrik va Arda Guler yanvar oyida “Real”ni tark etmaydi. Menda yosh futbolchilarga nisbatan hech qanday tarafkashlik yo‘q. Faoliyatim davomida yoshlar bilan ko‘p ishladim. Endrik ham Guler kabi shu yerda qoladi. 18 yoki 40 yosh bo‘lishidan qat’i nazar, har bir o‘yinga faqat eng yaxshi futbolchilarni tushirishga harakat qilaman. Ha, yoshlar biroz sabr qilishi kerak. Ular g‘ayratga to‘la, lekin ular yosh bo‘lgani uchun ham ba’zi narsalarni o‘rganishi kerak”, deydi Anchelotti.

Ma’lumot uchun, 18 yoshli Endrik shu yil yozda “qirollik klubi” safiga kelib qo‘shildi. U jamoa safida 14 ta o‘yinda maydonga tushib, 2 ta gol urdi va 1 ta golli uzatmani amalga oshirdi. 60 million yevroga baholanayotgan futbolchining jamoa bilan amaldagi shartnomasi 2030 yilga yoziga qadar mo‘ljallangan.

Eslatib o‘tamiz, avvalroq Arda Guler faoliyatini Germaniya chempionatida davom ettirishi mumkinligi xabar qilingandi.