Dunyoning eng xavfsiz 5 ta mamlakati e’lon qilindi

Islandiya, Yangi Zelandiya, Shveysariya, Sloveniya va Irlandiya dunyodagi eng xavfsiz 5 ta davlat deb tan olindi. Bu haqda Global Peace Index’ning 2026 yilgi hisobotida e’lon qilindi.

Ushbu reytingda xavfsizlik darajasi harbiy mojaro xavfi, jinoyatchilik, ijtimoiy barqarorlik va aholining o‘zini qanchalik xavfsiz his qilishi kabi 23 ta mezon asosida baholangan. Natijalarga ko‘ra, quyidagi davlatlar dunyodagi eng xavfsiz mamlakatlar sifatida qayd etildi:

1. Islandiya. Ushbu mamlakat 2008 yildan beri deyarli uzluksiz ravishda dunyoning eng xavfsiz davlati bo‘lib kelmoqda va 2026 yilda ham birinchi o‘rinni saqlab qoldi. Mamlakat aholisi juda kam – taxminan 370 ming atrofida bo‘lib, bu ijtimoiy nazorat va jamoaviy ishonchni kuchaytiradi. Islandiyada doimiy armiya yo‘q, politsiya esa odatda qurolsiz xizmat qiladi. Jinoyatchilik darajasi juda past bo‘lib, og‘ir jinoyatlar kam uchraydi. Shuningdek, kuchli ijtimoiy tenglik, yuqori sifatli ta’lim va sog‘liqni saqlash tizimi ham xavfsizlikning asosiy tayanchlaridandir. Tabiiy resurslarga boy va geotermal energiyadan keng foydalanilishi ham barqaror turmush tarzini ta’minlaydi.

2. Yangi Zelandiya. Bu mamlakat Osiyo-Tinch okeani mintaqasida eng xavfsiz davlat hisoblanadi va 2026 yilda ikkinchi o‘ringa ko‘tarildi. Aholisi 5 million atrofida bo‘lib, jamoalar o‘rtasidagi yaqinlik va ishonch juda yuqori. Mamlakatda qurol qonunlari qat’iy bo‘lib, 2019 yildagi Christchurch voqealaridan keyin yanada kuchaytirilgan. Shu sababli ommaviy zo‘ravonlik xavfi sezilarli darajada kamaygan. Geografik jihatdan izolyatsiya qilinganligi ham katta rol o‘ynaydi. Yangi Zelandiya yirik geosiyosiy mojarolardan ancha uzoqda joylashgan. Tabiatga yaqin turmush tarzi, keng ochiq hududlar va past urban stress darajasi ham aholining xavfsizlik hissini oshiradi.

3. Shveysariya. Mazkur mamlakat 2026 yilda uchinchi o‘rinni egalladi va Yevropaning eng barqaror davlatlaridan biri sifatida qolmoqda. Shveysariya uzoq yillardan beri betaraf siyosat yuritadi va hech bir harbiy ittifoqqa qo‘shilmagan. Aholi o‘rtasida ijtimoiy ishonch juda yuqori. Kundalik hayotda halollik va tartib-intizom kuchli seziladi. Yo‘qolgan buyumlarning egasiga qaytarilishi yoki jamoat qoidalariga rioya qilish bunga yaqqol misol. Shveysariya iqtisodiy jihatdan ham juda barqaror bo‘lib, yuqori daromad, sifatli infratuzilma va kuchli huquq tizimi xavfsizlikni mustahkamlaydi. Bundan tashqari, ish va hayot muvozanati yaxshi yo‘lga qo‘yilgani ham ijtimoiy stressni kamaytiradi.

4. Sloveniya. Bu davlat ilk bor eng xavfsiz 5 talikka kirdi. Mamlakat kichik bo‘lishiga qaramay, barqaror siyosiy tizim va past jinoyatchilik darajasi bilan ajralib turadi. Aholi tabiat bilan uyg‘un yashaydi. Alp tog‘lari, ko‘llar va o‘rmonlar kundalik hayotning ajralmas qismidir. Bu esa sog‘lom va xotirjam turmush tarzini shakllantiradi. Sloveniya Yevropa Ittifoqi a’zosi bo‘lib, iqtisodiy va siyosiy jihatdan barqaror mamlakat hisoblanadi. Ish va dam olish muvozanati kuchli bo‘lgani sababli jamiyatda stress darajasi past.

5. Irlandiya. Ushbu mamlakat beshinchi o‘rinni egalladi va past zo‘ravonlik darajasi hamda xalqaro mojarolarda deyarli ishtirok etmasligi bilan ajralib turadi. Mamlakat tarixiy tajribasi tufayli bag‘rikenglik va mehmondo‘stlik kuchli rivojlangan. Irlandiya jamiyatida ochiqlik va ijtimoiy qo‘llab-quvvatlash yuqori darajada. Shuningdek, Irlandiyaning betaraf siyosati ham uning xavfsizlik darajasini mustahkamlab turadi. Tabiiy landshaftlar – qirg‘oqlar, yashil tepaliklar va tarixiy joylar esa tinch va osoyishta hayot hissini yanada kuchaytiradi.

O‘zbekiston esa Global Peace Index 2026 reytingida 163 ta davlat orasidan 37-o‘rinni egallab, 10 pog‘ona yuqoriladi. Shuningdek, O‘zbekiston Markaziy Osiyo davlatlari ichida 1-o‘rinni egalladi.

Eslatib o‘tamiz, avvalroq “Remitly” kompaniyasi ko‘chib o‘tish uchun eng yaxshi davlatlar reytingini e’lon qilgandi.