Dunyoni yana yadroviy tahdid soyasi qamrab oldi – Guterrish

Ayrim davlatlar yadroviy quroldan foydalanish ehtimoli bilan tahdid qilayotgani sababli, yadro urushining soyasi yana bir bor dunyoni qamrab oldi. Bu fikr BMT Bosh kotibi Antoniu Guterrishning Yaponiyada Amerika tomonidan Xirosimaga atom bombasi tashlanganining 78 yilligiga bag‘ishlangan xotira tadbiridagi murojaatida bildirildi.

“Yadro urushi yana bong ura boshladi. Ishonchsizlik va tarqoqlik kuchaymoqda. Sovuq urush davrida butun dunyoni qamrab olgan yadro soyasi yana paydo bo‘ldi va ba’zi davlatlar yana bir bor o‘ylamasdan bu qirg‘in vositasidan foydalanish bilan tahdid qilmoqda", deyiladi murojaatda.

Bosh kotib yana bir bor barcha mamlakatlarni yadro qurolidan butunlay voz kechishga chaqirgan.

"Yadro urushi xavfini bartaraf etishning yagona yo‘li – yadro qurolini butunlay yo‘q qilishdir. Yadro qurolidan xalos bo‘lish qurolsizlanishning eng muhim ustuvor yo‘nalishi bo‘lib qolmoqda. Yadro soyasi butunlay yo‘qolguncha tinchlanmaymiz”, deydi Guterrish.

Shu bilan birga, u o‘z murojaatida hech qachon AQSHni sodir bo‘lgan voqealar uchun javobgar mamlakat sifatida tilga olmagan.

“Taxminan sakson yil oldin yadroviy qurol Xirosimani kulga aylantirdi. Birlashgan Millatlar Tashkiloti Xirosima aholisini va portlashlardan omon qolganlarni bu yerda sodir bo‘lgan voqealar xotirasini saqlab qolish, shuningdek, xavfsiz kelajakni ta’minlash uchun insoniyat o‘rganishi kerak bo‘lgan saboqlarni qo‘llab-quvvatlashdan faxrlanadi”, deydi Guterrish.

Ma’lumot uchun, 1945 yilda Xirosimaga tashlangan bombalar oqibatida bir kunda, turli ma’lumotlarga ko‘ra, 70 mingdan 100 minggacha odam halok bo‘lgan. 1945 yil oxiriga kelib, o‘lganlar soni 140 000 ga yetgan.