Dua Lipa G‘azoda doimiy o‘t ochishni to‘xtatishga chaqirdi 

Asli alban bo‘lgan britaniyalik qo‘shiqchi Dua Lipa muxlislarini G‘azo xalqi bilan birdamlik ko‘rsatishga chaqirdi. U 88 milliondan ortiq obunachi kuzatadigan Instagram'dagi sahifasida post qoldirdi.  

"#AllEyesonRafah (Barcha ko‘zlar Rafahda)" xeshtegi bilan hikoyalar bo‘limidagi postda Lipa shunday dedi: 

"Bolalarni tiriklayin yoqib yuborilishini hech qachon oqlab bo‘lmaydi, bunga biror sabab bo‘lishi mumkin emas. Butun dunyo Isroil genotsidini to‘xtatish uchun safarbar qilinmoqda”.

Shuningdek, Lipa G‘azoda "doimiy o‘t ochishni to‘xtatish"ga chaqirdi.

Ma’lumot uchun, 24 may kuni BMTning sud organi bo‘lmish Xalqaro sud Isroilga Rafahga hujumlarni zudlik bilan to‘xtatish, gumanitar yordamga to‘sqinlik qilmaslik va BMT rasmiylariga jinoyatlarni tergov qilish uchun G‘azoga kirishga ruxsat berish haqida buyruq chiqardi.

26 may kuni Isroil G‘azo sektoridagi Rafah shahridagi ko‘chirilgan falastinliklarning chodirlariga hujum qildi, bu yerda Xalqaro sud hujumlarni to‘xtatishga qaror qilgan edi.

Guvohlarning aytishicha, Isroil harbiy samolyotlari lagerga kamida sakkizta raketa zarbasi bergan.