Diyor Imomxo‘jayev Azizov va Ahmadjonovning O‘FAdagi faoliyatiga baho berdi

O‘zbekiston Futbol Assotsiatsiyasigaga (O‘FA) Umid Ahmadjonov kelganida, Professional futbol ligasining (PFL) ishlash tizimi tubdan o‘zgardi [shaffoflik yuzaga keldi]. Ayniqsa, tashkilotga Abdusalom Azizov rahbar bo‘lganidan keyin shaffoflik yuqori darajaga chiqdi. Bu haqda bugun, 4 fevral kuni bo‘lib o‘tgan matbuot anjumanida O‘zbekiston Professional ligasi direktori Diyor Imomxo‘jayev so‘z ochdi.

“Jurnalistika sohasidan chiqib kelganlar futbol mutaxassisi emas”, degan gapga qo‘shilmayman. Osiyo futbol konfederatsiyasida (OFK) bir qator sobiq jurnalistlar faoliyat olib bormoqda. Hozir PFLda ham ko‘plab sobiq jurnalistlar ishlayapti. Ertaga hozir jurnalist bo‘lib ishlayotganlar ham PFL va OFKda ishlashiga ishonaman. O‘z vaqtida Umid Ahmadjonov O‘FAga kelganida PFL ishlash tizimi tubdan o‘zgargandi. Abdusalom Azizov kelganidan keyin esa shaffoflik yanada yuqori darajaga chiqdi”, deydi Diyor Imomxo‘jayev.

Shuningdek, liga direktorining ta’kidlashicha, futzal chempionatini o‘tkazish faqat xarajat bo‘lyapti, ya’ni futzaldan tashkilotga foyda kelib tushmayapti.

“2021 yilda futzal chempionatlari uchun 854 million 977 ming ishlatdik. Hozircha bu faqat xarajat, lekin yaqin orada biz futzal chempionatiga ham homiylarni jalb qilamiz”, dedi Diyor Imomxo‘jayev. 

Anjuman davomida ma’lum bo‘lishicha, 2021 yilda hakamlar, nazoratchilar, shtat xodimlari va shartnoma asosida ishlaydigan xodimlarga jami 10 millard 599 million 781 ming so‘m mablag‘ to‘langan.

Ma’lumot uchun, Umid Ahmadjonov 2017 yil 12 sentyabr kuni O‘zbekiston Futbol Federatsiyasi (sobiq nomi) futbol ittifoqi rahbarligiga saylangan. Keyinchalik u tashkilot nomini O‘FAga o‘zgartirib, o‘zbek futbolida turli revolyutsion o‘zgarishlar qilishga intildi va qaysidir ma’noda bunga erishdi ham. Ammo, 2019 yilning 13 iyun kuni Umid Ahmadjonov iste’fogga chiqdi. 2019 yilning 15 iyul kuni Davlat xavfsizlik xizmati raisi Abdusalom Azizov Assotsiatsiya prezidenti etib saylandi.