“Chelsi” jahon chempionini sotib olmoqchi

Londonning “Chelsi” jamoasi “Inter” hujumchisi Lautaro Martinesni sotib olish imkoniyatini ko‘rib chiqmoqda. Bu haqda “Fichajes” nashri xabar berdi.

Manbaga ko‘ra, London klubi rahbariyati Martinesni hujum chizig‘ini kuchaytirish uchun asosiy nomzodlardan biri sifatida ko‘rmoqda va futbolchi uchun taxminan 100 million yevro taklif qilishga tayyor. Klub markaziy hujumchi pozitsiyasini mustahkamlash maqsadida yuqori darajadagi tajribaga ega o‘yinchini o‘z safiga qo‘shib olishni rejalashtirmoqda.

Ma’lumotlarga ko‘ra, “Chelsi” ushbu transferni moliyalashtirish uchun bir nechta futbolchilarni sotishi mumkin. Variantlardan biri — transfer bozorida narxi oshgan yosh o‘yinchilarni sotish orqali mablag‘ yig‘ishdir.

Ma’lumot uchun, Lautaro Martinesning “Inter” bilan amaldagi shartnomasi 2029 yilgacha mo‘ljallangan. Shunga qaramay, muhim moliyaviy taklif tushsa, tomonlar ehtimoliy transfer bo‘yicha muzokaralarga kirishishi mumkin. Joriy mavsumda argentinalik hujumchi Milan klubi safida barcha musobaqalarda 35 ta o‘yinda maydonga tushib, 18 ta gol urdi va 4 ta golli uzatmani amalga oshirdi.