Buyuk Britaniya avgust oyidan ukrainalik uchuvchilarni tayyorlashni boshlaydi

Buyuk Britaniya joriy yilning avgust oyidan boshlab ukrainalik harbiy uchuvchilarni G‘arb texnikalarini boshqarishga o‘rgatishni boshlaydi. Bu haqda mamlakat Mudofaa vaziri o‘rinbosari Jeyms Xippi ma’lum qildi. 

Qayd etilishicha, mashg‘ulotlarda Ukraina Qurolli kuchlarining 20 nafargacha harbiy xizmatchisi qatnashadi. 

"Buyuk Britaniya avgust oyida 20 tagacha ukrainalik uchuvchilar uchun asosiy tayyorgarlikni boshlaydi", deydi Xippi Leyboristlar partiyasidan Buyuk Britaniya parlamentining Jamoalar palatasi a’zosi Lyuk Pollardning savoliga javoban. 

Eslatib o‘tamiz, avvalroq AQSH ukrainalik uchuvchilarni to‘rtinchi avlod qiruvchi samolyotlarida, jumladan F-16 samolyotlarida o‘qitish bo‘yicha tashabbusda ishtirok etishga rozi bo‘lgandi. Shuningdek, ukrainalik uchuvchilar Shvetsiyaning JAS 39 Gripen qiruvchi samolyotlarida o‘quv parvozlarini amalga oshirish imkoniyatiga ega bo‘lishi haqida xabar berilgan.