Buxorodagi o‘quv markazi binosida portlash sodir bo‘ldi

Bugun, 4 yanvar kuni soat taxminan 00:52 da Buxoro viloyati, Buxoro shahar “Olim Xo‘jayev” mahallasi, mustaqillik ko‘chasida joylashgan 50/3 uyning yerto‘lasida chaqnash sodir bo‘ldi. Bu haqda Buxoro viloyati Favqulodda vaziyatlar boshqarmasi xabar berdi.

Qayd etilishicha, o‘quv markazi sifatida foydalanilayotgan binoning yerto‘la qismida dastlabki taxminlarga ko‘ra chaqnash sodir bo‘lgan va natijada yerto‘ladagi uch dona eshik romlar joyidan siljigan va 70 kvadrat metr maydonning tom qismidagi plastik qoplama zararlangan. Binodan tashqaridagi yerto‘laning beton qoplamasi zararlangan.

Ushbu baxtsiz hodisa natijasida jabrlangan va tan jarohati olganlar yo‘q.

“Hozirda chaqnash sabablari aniqlanmoqda”, deyiladi xabarda.

Eslatib o‘tamiz, 2022 yilning 24 dekabr kuni Qashqadaryo viloyatining Qarshi shahridagi shifoxonada chaqnash sodir bo‘lgani va portlash oqibatida ikki nafar fuqaro tan jarohati olib, shifoxonaga yotqizilgani haqida xabar berilgan edi. Keyinroq fuqarolardan biri tananing 80 foiz kuyishi tan jarohati sabab vafot etgani ma’lum bo‘ldi.