Britaniya diplomatlariga qo‘yilgan ayblovlarga javob qaytardi

Rossiyada akkreditatsiyadan mahrum bo‘lgan olti britaniyalik diplomat mamlakatni ancha oldin tark etgan. Bu haqda Buyuk Britaniyaning Moskvadagi elchixonasi xabar berdi.

"Britaniyalik diplomatlar bir necha hafta oldin Rossiyani tark etgan, ular allaqachon almashtirilmoqda. Bu va boshqa ingliz diplomatlariga qo‘yilgan ayblovlar kulgili ekani aniq. Holat Ukraina mojarosi va boshqa muammolar bilan bog‘liq davom etayotgan keskinlik sharoitida Buyuk Britaniyani obro‘sizlantirish bo‘yicha Rossiya kampaniyasining bir qismi", dedi Britaniya elchixonasi.

Shuningdek, elchixona may oyida Buyuk Britaniya hukumati Rossiyaning kuchayib borayotgan tahdidiga javoban Rossiya elchixonasiga qarshi choralar ko‘rganini va bir qator rus diplomatlari Londondagi elchixonani tark etganini ta’kidladi.

Eslatib o‘tamiz, avvalroq Rossiya britaniyalik diplomatlarni “qo‘poruvchilik”da ayblab, Sharqiy Yevropa va Markaziy Osiyo direksiyasi orqali mamlakatda bo‘lgan Britaniya elchixonasining olti nafar xodimini akkreditatsiyadan mahrum qilgan edi.