Braziliyada millionlab odamlar kuchli yomg‘ir tufayli uy-joysiz qoldi (video)

Braziliyaning San-Paulu shahrida kuchli yomg‘ir tufayli yo‘llar va metro tizimi suv ostida qoldi. Falokat oqibatida 96 kishi hayotdan ko‘z yumdi, yana 1,5 million kishi boshpanasiz qoldi. Bu haqda CNN Brazil xabar berdi.

Qayd etilishicha, suv oqimlari metro yo‘llarini va ko‘chalarni suvga to‘ldirgan, tashlab ketilgan avtomobillar deyarli to‘liq suv ostida qolgan. Shuningdek, savdo markazlaridan birining tomi qulab tushgan. Ma’lumotlarga ko‘ra, halokat oqibatida 96 kishi hayotdan ko‘z yumgan, yana 1,5 million kishi boshpanasiz qolgan. 14 ming aholi elektr energiyasidan mahrum bo‘lgan. Mahalliy hokimiyat favqulodda holat e’lon qilgan.

San-Paulu shtati Favqulodda vaziyatlar boshqarmasining Milliy meteorologiya institutiga tayanib xabar berishicha, bu San-Paulu shahrida 1961 yildan beri kuzatilgan uchinchi eng kuchli yomg‘ir yog‘ishi bo‘lgan. Unga ko‘ra, kecha, 24 yanvar kuni 125,4 millimetr yog‘ingarchilik qayd etilgan. Shundan 82 millimetri atigi bir soatda, ya’ni soat 15:00 dan 16:00 gacha yog‘gan. Bu hodisa 2006 yilning 25 iyulidan beri bir soat davomida qayd etilgan eng kuchli yog‘ingarchilik sifatida qayd etilgan.

Braziliya Fuqaro muhofazasi xizmatiga ko‘ra, hozirgi kungacha 131 kishi bedarak yo‘qolgan va 362 kishi jarohat olgan.

Ma’lumot uchun, bunday qishki tabiiy ofatlar Braziliya uchun odatiy holga aylanib bormoqda. So‘nggi bir necha yil davomida har fevral oyida – tropik yomg‘irlar mavsumida mamlakat janubiga kuchli yomg‘ir yog‘moqda. Masalan, 2023 yil fevral oyida bir kun ichida 600 million millimetrgacha yog‘ingarchilik kuzatilgan. Bu hodisa 65 kishining hayotiga zomin bo‘lgan. Joriy yilgi toshqinlar vaqtida esa 288 millimetrgacha yog‘ingarchilik qayd etildi.

Eslatib o‘tamiz, avvalroq Saudiya Arabistonining katta hududlari, jumladan, muqaddas Makka va Madina hamda Jidda shaharlari hududlarida kuchli yomg‘irdan keyin suv toshqini yuzaga kelgan edi.