Bir yil ichida Rossiyani 2 milliondan ortiq migrant tark etdi

O‘tgan yil davomida Rossiyada yashovchi 2 milliondan ortiq chet el fuqarolari mamlakatni tark etgan. Ayni paytda mamlakatda 6,17 million xorijiy fuqaro ro‘yxatga olingan. Bu haqda Rossiya Federatsiyasi Ichki ishlar vazirligining Migratsiya masalalari bo‘yicha bosh boshqarmasi xabar berdi.

“Joriy yilning 1 sentyabr holatiga ko‘ra, migratsiya ro‘yxatidan o‘tish davlat axborot tizimida ma’lumotlar mavjud bo‘lgan Rossiyada bo‘lgan chet el fuqarolari soni 6 million 174 ming 777 nafarni tashkil etadi”, deyiladi xabarda.

Iyun oyi oxirida Rossiya Federatsiyasining Inson huquqlari bo‘yicha vakili Tatyana Moskalkova butun 2023 yil davomida Rossiya Federatsiyasida 8,5 milliondan ortiq odam migratsiya uchun ro‘yxatdan o‘tganini aytgan.

“MDHga a’zo davlatlar fuqarolarining aksariyati Rossiyada ishlaydi. 2023 yilda hududimizga 9 973 338 kishi ko‘chib kelgan. Shundan 8 million 507 ming 906 nafari migratsiya bo‘yicha ro‘yxatga olingan”, deydi Moskalkova.

Shu bilan birga, joriy yilning iyul oyida Rosstat Rossiyaga migrantlar oqimi so‘nggi o‘n yil ichida minimal darajaga tushgani haqida xabar bergan edi.

“2023 yilda Rossiya Federatsiyasiga chet eldan 560 ming kishi kelgan, bu o‘tgan yilga nisbatan 23 foizga kam, o‘sha paytdagi oqim 730 ming kishini tashkil etgan”, deya ta’kidladi Rosstat.

Mart oyida Moskva yaqinidagi “Krokus Siti Holl” konsert zalida Tojikiston fuqarolari ayblangan teraktdan keyin Rossiya hukumati migratsiya siyosatini kuchaytira boshladi. Iyun oyida Davlat Dumasi Rossiya Federatsiyasida migrantlarning bo‘lish tartibini qattiqlashtiruvchi qonun loyihasini qabul qildi (shu jumladan, tegishli reyestrni yaratish). Hujjat 2025 yil 5 fevraldan kuchga kirishi kerak, shu vaqtgacha reyestr ham ishga tushirilishi kerak.

Eslatib o‘tamiz, sentyabr oyi boshida Tojikiston Rossiya Federatsiyasi hududida amaldagi “xorijiy fuqarolarning kirib kelishini nazorat qilishning kuchaytirilgan rejimi” munosabati bilan o‘z fuqarolariga “o‘ta zarurat bo‘lmasa, Rossiya Federatsiyasiga borishdan vaqtincha voz kechishni” tavsiya qilgan edi.  Ilgari Qirg‘iziston ham xuddi shunday tavsiya bilan chiqqan edi.