Berluskonidan qancha meros qolgani ma’lum bo‘ldi

Joriy yilning 12 iyun kuni vafot etgan Italiyaning sobiq bosh vaziri Silvio Berluskonining merosi salkam 5 milliard yevroga baholanmoqda. Meros uning 5 farzandi va 16 nabirasiga o‘tadi. Bu haqda “Corriere della Sera” gazetasi xabar berdi.

Keltirilishicha, Berluskoniga tegishli boylikning asosiy ulushi 4,89 milliard yevroga baholangan “Fininvest” oilaviy holdingiga to‘g‘ri keladi, uning tarkibiga “Mediaset” telekompaniyasining 50 foizi va “Mondadori” nashriyotining 53 foizi, shuningdek, “Mediolanum” banki kiradi. Besh farzandning har biri (birinchi nikohdan ikki kattasi – Marina va Per Silvio – u yerda asosiy o‘rinlarni egallaydi) 7,65 foizga egalik qiladi.

Forbes jurnalining so‘nggi reytingiga ko‘ra, Berluskoni Italiyaning eng boy odamlari ro‘yxatida uchinchi o‘rinni egallagan. Ba’zi yillarda u birinchi o‘ringa chiqqan. Jurnal uning boyligini 6,9 milliard yevroga baholagan.

Berluskoni biznesdan tashqari, bir nechta villa, saroy va uylarga ega bo‘lgan. Uning Milan yaqinidagi eng mashhur qarorgohi Arkordagi Villa San Martino bo‘lib, u yerda kecha, 13 iyun kuni siyosatchi bilan vidolashuv yakka tartibda, faqat yaqinlari uchun bo‘lib o‘tgan. Shuningdek, Berluskonining yana bir mashhur qarorgohi – Sardiniya orolidagi yozgi Sertosa hisoblanadi.

Berluskoni Milan yaqinida yana bir nechta villaga, shuningdek, Rimdagi qadimiy Appian yo‘lidagi uyga egalik qilgan. Gazeta, shuningdek, siyosatchinining xorijdagi, jumladan, Kann, Bermud va Antiguadagi mulki haqida ham xabar bergan.

Moddiy merosdan tashqari, Berluskoni hali ham o‘zi asos solgan va boshqargan “Olg‘a, Italiya” partiyasiga ega. Mahalliy tahlilchilarning fikricha, bu “yagona yetakchi” partiya usiz ham ertami kech yo‘q bo‘lib ketadi. “Olg‘a, Italiya” hukmron koalitsiya tarkibiga kirayotgani va Giorgi Meloni hukumatini qo‘llab-quvvatlayotganini inobatga olib, uning rahbarligini kim qo‘lga kiritishi haqida OAVda taxminlar bor.

Eslatib o‘tamiz, ikki kun oldin Italiyaning sobiq bosh vaziri Silvio Berluskoni 87 yoshida Milandagi shifoxonada vafot etgan edi.