Baydenda prostata saratoni aniqlandi

AQSHning sobiq prezidenti, 82 yoshli Jo Baydenga agressiv prostata saratoni tashxisi qo‘yildi. Bu haqda kecha, 18 may kuni uning matbuot kotibi ma’lum qildi.

“Prezident Jo Bayden o‘tgan haftada tez-tez siyish alomatlarini seza boshlaganidan so‘ng prostata bezi tugunini tekshirib ko‘rdi”, deyiladi bayonotda.

16 may kuni unga prostata saratoni tashxisi qo‘yildi, bu Glison balli 9 ball (5-darajali guruh) suyaklarga metastazlar bilan tavsiflanadi.

Ta’kidlanishicha, gap “kasallikning yanada agressiv shakli” haqida ketayotgan bo‘lsa-da, saraton o‘simtasi, aftidan, “gormonlarga sezgir bo‘lib, uni samarali davolashga imkon beradi”.

“Jo Bayden va uning oilasi davolash usullarini baholash uchun shifokorlari bilan ishlamoqda”, deyiladi bayonotda.

CNN manbasiga tayanib xabar berishicha, Bayden shu dam olish kunlari Delaver shtatidagi Uilmingtondagi uyida.

“Bir necha kun avval Baydenning matbuot kotibi AQSHning sobiq prezidenti yaqinda prostata bezida topilgan “kichik bo‘lak” tufayli tekshiruvdan o‘tganini aytdi”, deb xabar bermoqda CNN.

AQSH Prezidenti Donald Tramp o‘zi va rafiqasi Melaniya nomidan kecha, 18 may oqshomida  Jo Baydenga tezroq tuzalib ketishini tiladi.

“Melaniya va men Jo Baydenning yaqinda qo‘yilgan tibbiy tashxisi haqida qayg‘udamiz. Jill va uning oilasiga eng samimiy va eng yaxshi tilaklarimizni bildiramiz hamda Joga tez va muvaffaqiyatli tuzalib ketishini tilaymiz”, deb yozdi Oq uyning amaldagi rahbari o‘zining Truth Social ijtimoiy tarmog‘ida.

O‘z navbatida, AQSHning sobiq prezidenti Barak Obama Bayden saratonga qarshi “qat’iyat va inoyat” bilan kurashishiga ishonch bildirdi.

“Mishel va men butun Bayden oilasi haqida o‘ylayapmiz. Hech kim Jodan ko‘ra saratonning barcha shakllarida ilg‘or davolash usullarini izlagani yo‘q va ishonchim komilki, u o‘zining qat’iyatliligi va inoyati bilan bu qiyinchilikka qarshi kurashadi. Biz uning tez va to‘liq tuzalishi uchun ibodat qilamiz”, deb yozdi u X ijtimoiy tarmog‘ida.

AQSHning sobiq vitse-prezidenti va Demokratik partiyadan 2024 yilgi prezidentlik sayloviga nomzod Kamola Harris o‘zining X mikroblogida shunday ta’kidladi:

“Jo – jangchi. Bilaman, u bu qiyinchilikka doimo o‘zining hayoti va yetakchiligini belgilab bergan bir xil kuch, chidamlilik va nekbinlik bilan duch keladi. Biz to‘liq va tez tiklanishni kutamiz”.