Bayden Zelenskiyga qo‘ng‘iroq qildi

AQSH Prezidenti Jo Bayden kecha, 11 dekabr kuni Ukraina yetakchisi Vladimir Zelenskiy bilan telefon orqali muloqot qildi. Bu haqda Oq uy matbuot xizmati xabar berdi. 

Amerika yetakchisi Zelenskiyning BMT Nizomining fundamental tamoyillariga asoslangan adolatli dunyoga ochiqligini ma’lum qilganini olqishlagan. Bayden Ukrainaga iqtisodiy, gumanitar va xavfsizlik sohasida yordam ko‘rsatish va Rossiyani javobgarlikka tortishga sodiqligini yana bir bor tasdiqlagan. 

AQSH ma’muriyati rahbari Ukrainaning muhim infratuzilmasiga zarbalar berilgani sababli, Qo‘shma Shtatlar Ukraina mudofaasini qo‘llab-quvvatlash davom etayotganini ta’kidlagan.

Prezidentning ta’kidlashicha, Qo‘shma Shtatlar Ukraina havo hujumidan mudofaa tizimini xavfsizlikni ta’minlash orqali kuchaytirishga qaratilgan sa’y-harakatlarga ustuvor ahamiyat qaratmoqda, jumladan, 9 dekabrda 275 million dollarlik qo‘shimcha o‘q-dorilar va jihozlar, xususan, Rossiyaning uchuvchisiz uchish apparatlaridan foydalanishiga qarshi tizimlar paketi e’lon qilingan.

Prezident Bayden, shuningdek, Qo‘shma Shtatlar 29 noyabr kuni Ukraina energetika infratuzilmasini qo‘llab-quvvatlash uchun 53 million dollar ajratishini ma’lum qilganini eslatgan. 

Zelenskiy Telegram kanali orqali Bayden bilan suhbatda Ukraina taklif qilayotgan tinchlik formulasi ijobiy qabul qilinayotganini eshitgan.

Ukraina Prezidenti 15 noyabr kuni Balidagi G20 sammitidagi videomurojaati chog‘ida ilk bor e’lon qilgan reja yadroviy, oziq-ovqat va energetika xavfsizligini ta’minlash, mahbuslarning umumiy almashinuvi, shuningdek, Rossiya qo‘shinlarini olib chiqish va Ukrainaning hududiy yaxlitligini tiklashni o‘z ichiga oladi. 

Zelenskiy saytida yozilishicha, Prezidentlar samarali havo hujumidan mudofaa tizimini shakllantirish va muhim infratuzilmani himoya qilish, shuningdek, energetika tizimini tiklash masalalarini muhokama qilgan.