Bayden Ukrainaga so‘nggi yordam paketini ajratmoqchi

AQSHning amaldagi Prezidenti Jo Bayden administratsiyasi respublikachi Donald Tramp Oq uyga qaytishi oldidan Ukrainaga 6 milliard dollardan ortiq so‘nggi yordam paketini yuborishni rejalashtirmoqda. Bu haqda “Politico” xabar berdi.

Qayd etilishicha, bu demokratlarning Ukraina uchun mavjud bo‘lgan yagona varianti. Kiyevga bu yordamni tezkor yuborishdagi to‘siq shundaki, AQSH faqat mavjud asbob-uskuna va texnikalarni jo‘natish imkoniyatiga ega. Yangilarini ishlab chiqarish esa vaqt talab qiladi. Mavjud o‘q-dorilarni yuborishga Pentagon qarshilik qilishi ham mumkin, sababi bu uning harbiy shayligiga ta’sir qiladi.

“Muammolar juda katta. Odatda yordam paketi e’lon qilingach, o‘q-dorilar va jihozlarning Ukrainaga yetib borishi uchun bir necha oy vaqt ketadi. Shu sababli, yaqin haftalarda e’lon qilinadigan har qanday yordam to‘liq yetkazib berilishi Tramp ma’muriyati davriga to‘g‘ri keladi. Bundan tashqari, yangi saylangan prezident yuklarni manzilga yetib borishidan oldin to‘xtatib qo‘yishi mumkin”, deyiladi xabarda.

Trampning Ukrainaga ko‘rsatilayotgan yordamni tanqid qilishi, oxir-oqibat ittifoqchilarni muzlatilgan Rossiya aktivlaridan olingan 48 milliard dollarga yaqin foizni Ukrainaga qayta tiklash va qurol-yarog‘ sotib olish uchun kredit sifatida berishga undadi. Bayden ma’muriyati ushbu mablag‘dan Kiyevga taxminan 20 milliard dollar miqdorida kredit ajratishni va’da qilgan, biroq bu va’daning taqdiri, ko‘p narsalar singari, hozircha noma’lum bo‘lib turibdi.

Yevropa Ittifoqi mamlakatlari Trampning AQSHdagi prezidentlik saylovlarida g‘alaba qozongani fonida Ukrainani qo‘llab-quvvatlashni davom ettirmoqchi.

Eslatib o‘tamiz, avvalroq AQSH Ukrainaga 425 million dollar miqdoridagi yangi harbiy yordam paketi ajratgandi. Yangi paketga NASAMS zenit majmualari uchun o‘q-dorilar, HIMARS ko‘p martalik raketa tizimlari, Stinger ko‘chma zenit-raketa majmualari, shuningdek, 155 va 105 mm kalibrli artilleriya snaryadlari kiradi. Qo‘shimcha ravishda TOW tankka qarshi tizimlari uchun o‘q-dorilar, Javelin va AT-4 majmualari, dronlarga qarshi vositalar, aviatsiya o‘q-dorilari, Stryker bronetransportyorlari, o‘qotar qurol va tibbiy uskunalar kiradi.