Bayden ma’muriyati Turkiyaga qiruvchi samolyotlarni sotish bo‘yicha Kongressdan ruxsat olmoqchi

AQSH Prezidenti Jo Bayden ma’muriyati Turkiyaga F-16 qiruvchi samolyotlarini sotish bo‘yicha Kongressdan ruxsat olmoqchi. Bu haqda juma kuni “The Wall Street Journal” AQSH ma’muriyati vakillariga tayanib xabar berdi.

Uning so‘zlariga ko‘ra, gap 40 ta yangi qiruvchi samolyot, shuningdek, Turkiya bilan xizmat ko‘rsatayotgan ushbu turdagi 79 ta samolyotni modernizatsiya qilish uchun to‘plamlar haqida ketmoqda. Bundan tashqari, AQSH Turkiyaga 900 ta “havo-havo” raketalari (samolyotlarni yo‘q qilish uchun mo‘ljallangan) va 800 ta bomba sotish niyatida. 

Gazetaning yozishicha, qurol sotish bo‘yicha qaror Turkiya tashqi ishlar vaziri Mevlut Chavusho‘g‘lining 17-18 yanvar kunlariga mo‘ljallangan AQSHga tashrifi bilan bir vaqtga to‘g‘ri kelishi mumkin.

Ta’kidlanishicha, F-16’ni Turkiyaga sotish qarori bilan bir vaqtda AQSH qonunchilari Gretsiyaga kamida 30 ta beshinchi avlod F-35 qiruvchi samolyotini sotishni ma’qullashi mumkin. Nashrning yozishicha, bu Vashington va Anqara o‘rtasidagi ehtimoliy kelishuv munosabati bilan Afinadagi norozilik darajasini pasaytiradi.

Dekabr oyida F-16 samolyotlarini Turkiyaga sotish bo‘yicha cheklovlarni o‘z ichiga olgan bandlar AQSH mudofaa byudjeti loyihasidan chiqarib tashlangani xabar qilingandi. Anqarada bu Qo‘shma Shtatlar tomonidan ijobiy qadam sifatida qabul qilindi, chunki Turkiyaga samolyot sotish bir qator shartlarga bog‘liq edi. Agar qonun loyihasi Kongressning ikkala palatasi tomonidan qabul qilinsa, hujjat imzolash uchun AQSH Prezidentiga yuboriladi.