“Barselona” murabbiyligi uchun asosiy nomzod ma’lum bo‘ldi

“Jirona” bosh murabbiyi Anxel Michel “Barselona” bosh murabbiyi lavozimida Xavi o‘rnini egallashi mumkin. Bu haqda futbol jurnalisti Fransua Gallardo o‘z X sahifasida ma’lum qildi.

Manbaga ko‘ra, Michelning agenti oktyabr oyidan beri “Barselona” vakillari bilan uchta uchrashuv o‘tkazgan. “Ko‘k-anorranglilar”ning o‘yinida hech narsa o‘zgarmasa, u 2024/2025 yilgi mavsumda “Barselona” bosh murabbiyi bo‘ladi. Mavsum tugamasdan Xavi ishdan bo‘shatilsa, Michel kelguniga qadar “Barselona B”da ishlaydigan Rafa Markes asosiy jamoada vaqtinchalik murabbiy vazifasini bajaradi.

Ispaniya chempionatining 16-turidan keyin “Barselona” 34 ochko bilan turnir jadvalida 3-o‘rinni egallab turibdi. Jamoa peshqadam “Jirona”dan 7 ochko ortda qolmoqda.

14 dekabrga o‘tar kechasi jamoa Yevropa Chempionlar ligasining oxirgi turida safarda “Antperven” bilan kuch sinashib, 3:2 hisobida imkoniyatni boy berdi, lekin shunday bo‘lishiga qaramay jamoa guruhda birinchi o‘rinni egallab, turnirning pley-off bosqichiga yo‘llanma oldi.