“Barselona” asr rekordini o‘rnatdi

Ispaniya La Ligasining 2024/2025 yilgi mavsumining 21-tur uchrashuvlari yakuniga yetdi. Mazkur turda Kataloniyaning “Barselona” va “Valensiya” klublari to‘qnash keldi. Jamoalar Barselonadagi "Olimpiya" stadionida kuch sinashdi. Bahsda “Barselona” “Valensiya”ni 7:1 hisobida mag‘lub etib, XXI asr rekordini o‘rnatdi.

Bu mavsumda Xans-Diter Flik qo‘l ostidagi Kataloniya jamoasi gollari soni 100 (101) goldan oshib ketdi. Bunga erishish uchun “Barselona”ga 32 ta o‘yin kerak bo‘ldi. Faqat Helenio Errera jamoasi 100 ta gol uchun 1958/1959 yilgi mavsumda 31 ta o‘yin sarflagan.

O‘tkazilgan 21 o‘yindan so‘ng “Barselona” 42 ochko bilan La Liga turnir jadvalida 3-o‘rinda bormoqda. Jamoaning azaliy raqibi Madridning “Real” klubi esa 49 ochko bilan turnir jadvalida yetakchilik qilmoqda. 45 ochko bilan Atletiko 2-o‘rinni band etgan.

Ma’lumot uchun, “Barselona” La Liga doirasidagi keyingi o‘yinini 2 fevral kuni o‘z uyida “Alaves”ga qarshi o‘tkazadi. 22-turda “Atletiko” o‘z uyida “Malorka”ni qabul qiladi, “Real” esa safarda “Espanol”ga qarshi bahs olib boradi.