Baku Lochin yo‘lagini vaqtincha yopti

Kecha, 11iyul kuni Ozarbayjon Lochin chegara punkti faoliyatini to‘xtatganini ma’lum qildi. Bu haqda “Interfax” mamlakat chegara xizmati xabariga tayanib xabar berdi.

Aytilishicha, bunga Xalqaro Qizil Xoch qo‘mitasiga qarashli avtomashinalar orqali kontrabandaning takroriy olib o‘tilishga urinishlar sabab qilib ko‘rsatilgan.

“Yuqoridagi holatlar yuzasidan Ozarbayjon Jinoyat kodeksining tegishli moddalari bilan jinoyat ishi qo‘zg‘atilib, zarur tergov tadbirlari yakunlanguniga qadar Lochin bo‘ylab harakatlanish vaqtincha to‘xtatildi”, deyiladi xabarda.

Ozarbayjon tomoniga ko‘ra, kontrabandachilar Lochin yo‘lagi orqali olib o‘tilgan ruxsat etilmagan tovarlar orasida telefonlar, quvvatlovchi qurilmalar va benzin ham bor.

Xalqaro Qizil Xoch qo‘mitasi kontrabandachilar faoliyatiga aloqadorlik gumonlarini rad etgan. 

“Qo‘mita Lochin yo‘lagi orqali ruxsat etilmagan tovarlarning olib o‘tishi yuzasidan bildirilgan xavotirlardan xabardor va bunday faoliyatni qo‘llab-quvvatlamaydi. Xalqaro Qizil Xoch qo‘mitasi avtomashinalarining hech birida ruxsat etilmagan tovarlar topilmadi. Barcha yuklar Ozarbayjon Respublikasi bojxona nazoratidan o‘tkaziladi”, deyiladi tashkilot munosabatida.

Xabarlarga ko‘ra, to‘rt nafar yollangan haydovchi vaqtinchalik qo‘mita yorlig‘i yopishtirilgan avtomashinalarda bir qancha tijorat tovarlarini Tog‘li Qorabog‘ga olib o‘tmoqchi bo‘lgan.

"Bu shaxslar qo‘mita xodimlari emas va tashkilot ular bilan tuzilgan xizmat shartnomalarini darhol bekor qildi. Bizning Lochin yo‘lagidagi ishimiz doimo insonparvarlik xarakteriga ega", deya izohlagan tashkilot.

Ma’lumot uchun, Lochin yo‘lagi Armanistonni Tog‘li Qorabog‘ bilan bog‘laydigan yagona yo‘ldir. 2023 yil 23 aprelda Baku Xakari ko‘prigida nazorat-o‘tkazish punkti o‘rnatdi va buni inson kuchi, qurol-yarog‘ va minalarni noqonuniy tashishning oldini olish zarurati bilan asoslagan.

O‘z navbatida, Armaniston bu kabi ayblovlarni rad etib, Ozarbayjon 2020 yilgi sulh bitimini qo‘pol ravishda buzayotganini aytgan.