BAA Isroil va AQSH bilan G‘azo sektori boshqaruvini muhokama qilmoqda

Birlashgan Arab Amirliklari (BAA) Isroil va Qo‘shma Shtatlar bilan Isroil qo‘shinlari olib chiqib ketilganidan keyin va Falastin milliy ma’muriyati (FMM) to‘liq nazoratga olinmaguncha, G‘azo sektorini vaqtinchalik boshqarishda ishtirok etish masalasini muhokama qildi. Bu haqda bugun, 7 yanvar kuni o‘nlab xorijiy diplomatlar va G‘arb rasmiylariga tayanib, "Reuters" xabar berdi.

Qayd etilishicha, BAA AQSHning xavfsizlik bo‘yicha yaqin hamkori bo‘lib, Isroil bilan diplomatik aloqalarni davom ettirib, Bosh vazir Binyamin Netanyaxu hukumatiga ma’lum darajada ta’sir ko‘rsatadi.

Nashr manbalariga ko‘ra, sahna ortidagi muzokaralar davomida Abu-Dabidagi siyosatchilar Isroil ochiqchasiga qarshi chiqqan mustaqil Falastin davlati doirasida G‘azo sektori, G‘arbiy Sohil va Sharqiy Quddus ustidan nazoratni davom ettirishni ta’minlash uchun FMMni isloh qilishni yoqlamoqda.

“BAA Falastin ma’muriyatini jiddiy isloh qilish, uning vakolatlarini kengaytirish va Falastin davlatini yaratish bo‘yicha ishonchli yo‘l xaritasini ishlab chiqishni o‘z ichiga olmagan hech qanday rejada ishtirok etmaydi”, dedi Birlashgan Arab Amirliklari vakili.

Uning fikricha, bu elementlar hozir yo‘q, lekin G‘azodagi janglar tugaganidan keyin har qanday rejaning muvaffaqiyati uchun zarur.

"Reuters" agentligi bilan suhbatlashgan diplomatlar va rasmiylar BAAdagi muzokaralar chog‘ida ilgari surilgan g‘oyalar tafsilotlari yo‘qligi, yozma reja sifatida rasmiylashtirilmagani va hukumatlar tomonidan qabul qilinmaganini ta’kidladi.

AQSH Davlat departamenti vakili, "shaxsiy diplomatik suhbatlar"ning nozik tabiati tufayli qo‘shimcha izoh berishdan bosh tortgan holda, "Bular biz oldinga eng yaxshi yo‘lni qidirayotgan bir paytda davom etayotgan munozarali muhokamalar edi", dedi.

To‘rt diplomat va G‘arb rasmiylari, shuningdek, Amirlik hukumati G‘azo sektoridagi urushdan keyingi tinchlikparvar kuchlar tarkibida xususiy harbiy pudratchilardan foydalanishni taklif qilganini aytdi. Biroq bunday pudratchilarning joylashtirilishi G‘arb mamlakatlarida xavotir uyg‘otishi mumkin. Iroq va Afg‘onistonda bunday pudratchilar avval ham qiynoqlar va inson huquqlarini poymol qilishda ayblangan.

"Urush paytida G‘azo sektori katta oziq-ovqat inqiroziga duch kelmoqda. Xalqaro hamjamiyat G‘azo bo‘yicha hayotiy rejani ishlab chiqishda qiynalmoqda", deya ta’kidladi "Reuters".