Avtomobillar uchun “rastamojka” narxi pasaytirilmoqda

O‘zbekistonda ayrim toifadagi mashinalar uchun bojxona to‘lovlari keskin kamaytiriladi. 

Bugun, 16 iyun kuni Prezident Shavkat Mirziyoyev tomonidan imzolangan “Aholining yengil avtotransport vositalariga bo‘lgan ehtiyojini qondirish bo‘yicha qo‘shimcha chora-tadbirlar to‘g‘risida”gi qarorda keltirilgan.

Hujjatga ko‘ra, ishlab chiqarilganiga 1 yildan oshmagan, dvigatel hajmi 1 200 sm kubdan yuqori bo‘lmagan yangi yengil avtotransport vositalari (TN TIF kodi 8703 21 10, 8703 22 10 va 8703 31 10) uchun 2026 yil 1 yanvarga qadar quyidagi bojxona boji stavkalari belgilanmoqda:

1000 sm kubgacha – 0% (amalda – 15 foiz + 0,4 AQSH dollari/kub sm);

1000-1200 sm kub – 5% (amalda – 15 foiz + 0,6 AQSH dollari/kub sm).

Natijada dvigatel hajmi 1000 sm kubgacha bo‘lgan avtomobillar uchun bojxona to‘lovlarining jami miqdori amaldagi 39-43 foizdan 19-23 foizgacha, dvigatel hajmi 1000-1200 sm kub bo‘lgan avtomobillar uchun esa 44-52 foizdan 30-36 foizgacha kamayadi.

Muhsinjon Umurzoqov