Автомобиллар учун “растаможка” нархи пасайтирилмоқда

Ўзбекистонда айрим тоифадаги машиналар учун божхона тўловлари кескин камайтирилади. 

Бугун, 16 июнь куни Президент Шавкат Мирзиёев томонидан имзоланган “Аҳолининг енгил автотранспорт воситаларига бўлган эҳтиёжини қондириш бўйича қўшимча чора-тадбирлар тўғрисида”ги қарорда келтирилган.

Ҳужжатга кўра, ишлаб чиқарилганига 1 йилдан ошмаган, двигатель ҳажми 1 200 см кубдан юқори бўлмаган янги енгил автотранспорт воситалари (ТН ТИФ коди 8703 21 10, 8703 22 10 ва 8703 31 10) учун 2026 йил 1 январга қадар қуйидаги божхона божи ставкалари белгиланмоқда:

1000 см кубгача – 0% (амалда – 15 фоиз + 0,4 АҚШ доллари/куб см);

1000-1200 см куб – 5% (амалда – 15 фоиз + 0,6 АҚШ доллари/куб см).

Натижада двигатель ҳажми 1000 см кубгача бўлган автомобиллар учун божхона тўловларининг жами миқдори амалдаги 39-43 фоиздан 19-23 фоизгача, двигател ҳажми 1000-1200 см куб бўлган автомобиллар учун эса 44-52 фоиздан 30-36 фоизгача камаяди.

Муҳсинжон Умурзоқов