Ash-Shara neftni Suriya orqali tashishni taklif qilmoqda

Suriya Prezidenti Ahmad ash-Shara Yaqin Sharq mamlakatlarini savdo yo‘llarini qayta qurish va AQSH va Eron o‘rtasidagi mojaro oqibatlarini bartaraf etish uchun Suriyaning logistika imkoniyatlaridan foydalanishga chaqirdi.

“Suriya o‘tgan yili Damashqqa kelganimizdan beri o‘zining strategik joylashuvi muhimligini ta’kidladi, ammo aslida dunyo bunga Eronda urush boshlanganidan keyin e’tibor qaratdi. Suriya energiya yetkazib berish uchun xavfsiz yo‘lak va muqobil yo‘nalishdir. Bu, ayniqsa, Fors ko‘rfazi mamlakatlari va Turkiya o‘rtasidagi transport aloqalariga taalluqlidir. Suriyaning O‘rta yer dengiziga kirish imkoniyati uni sharqiy va g‘arbiy ta’minot zanjirlari o‘rtasidagi ajoyib va ishonchli bo‘g‘inga aylantiradi”, deydi Suriya rahbari Turkiyaning “Anadolu” agentligiga bergan intervyusida.

Uning ta’kidlashicha, AQSH harbiy operatsiyasi tufayli yuzaga kelgan logistika inqirozi fonida Iroq neftining bir qismi allaqachon Suriya dengiz portlari orqali eksport qilinmoqda. Uning fikricha, Damashqning Turkiya, Iordaniya va Fors ko‘rfazi mamlakatlari bilan yaxshi munosabatlari muqobil ta’minot zanjirlarini rivojlantirishga xizmat qiladi. Ash-Shara hozirgi vaziyatdan kelib chiqib, ayrim mamlakatlar uchun vaqtinchalik yechimlar tez orada doimiy bo‘lib qolishiga umid qilmoqda.

Suriya Prezidenti "To‘rt dengiz" dasturi eng istiqbolli loyiha ekanini bildirgan. Suriya rahbariyatining fikriga ko‘ra, u Ozarbayjon, Suriya va Turkiya hududi orqali Kaspiy, O‘rta yer dengizi va Qizil dengiz, shuningdek, Fors ko‘rfazi logistikasini bog‘lashi kerak. Ish davom etayotgan ushbu loyihani amalga oshirish savdo yo‘nalishlarini optimallashtirish va butun mintaqada logistikani arzonlashtirish imkonini beradi.