APL klubi Vinisius transferi uchun 200 million yevro sarflamoqchi

“Manchester Yunayted” yozgi transfer oynasida futbol tarixidagi eng yirik transferlardan birini amalga oshirmoqchi. Bu haqda “Le10sport” xabar berdi.

Manbaga ko‘ra, “Manchester Yunayted” “Real” hujumchisi Vinisius Juniorni o‘z safiga qo‘shib olishni maqsad qilgan va buning uchun “qizil iblislar” taxminan 200 million yevrolik taklif tayyorlamoqda.

To‘g‘ri, bu taklif haligacha Florentino Peres va uning jamoasini befarq qoldirmoqda, ular Kilian Mbappening PSJdan yaqinlashib kelayotganiga qaramay, 23 yoshli braziliyalikni o‘z jamoasining fundamental o‘yinchilaridan biri deb hisoblaydi.

Vinisius joriy mavsumda “Real” safida 23 ta o‘yinda maydonga tushib, 12 ta gol va 7 ta golli uzatmaga mualliflik qilgan. “Trasnfermarkt” 23 yoshli braziliyalik futbolchini 150 million yevroga baholamoqda va uning qirollik klubi bilan shartnomasi 2027 yilning yoziga qadar amal qiladi.