APL klubi Kvaratsxeliya uchun kosmik summa to‘lamoqchi

Angliyaning “Liverpul” klubi Italiyaning “Napoli” jamoasi hujumchisi Xvicha Kvaratsxeliyani o‘z safiga qo‘shib olmoqchi. Bu haqda “Fichajes” xabar berdi.

Manbaga ko‘ra, ingliz klubi yozgi transfer oynasida 22 yoshli gruziyalik futbolchi uchun 130 million yevro taklif qilishga tayyor. “Liverpul” joriy mavsumdagi salbiy natijalardan so‘ng katta transferni rejalashtirmoqda.

22 yoshli Kvaratsxeliya 2022 yilning yozida “Napoli”ga ko‘chib o‘tgandi. U faoliyati davomida Rossiya Premer-ligasida o‘ynab, Moskvaning “Lokomotiv” va Qozonning “Rubin” klublari sharafini himoya qilgan. 

Italiya chempionatining joriy mavsumida Xvicha 24 uchrashuvda 12 ta gol urdi va 12 ta golli uzatmani amalga oshirdi. “Napoli” chempionat yakunlanishiga 10 tur qolganida 71 ochko bilan A Seriya turnir jadvalida peshqadamlik qilmoqda va eng yaqin ta’qibchisi “Latsio”dan 16 ochko farq bilan oldinda bormoqda.

“Transfermarkt” portali futbolchining narxini 85 million yevroga baholamoqda.