АПЛ клуби Кварацхелия учун космик сумма тўламоқчи
Спорт
−
14 Апрель 2023 4294
Англиянинг “Ливерпуль” клуби Италиянинг “Наполи” жамоаси ҳужумчиси Хвича Кварацхелияни ўз сафига қўшиб олмоқчи. Бу ҳақда “Fichajes” хабар берди.
Манбага кўра, инглиз клуби ёзги трансфер ойнасида 22 ёшли грузиялик футболчи учун 130 миллион евро таклиф қилишга тайёр. “Ливерпуль” жорий мавсумдаги салбий натижалардан сўнг катта трансферни режалаштирмоқда.
22 ёшли Кварацхелия 2022 йилнинг ёзида “Наполи”га кўчиб ўтганди. У фаолияти давомида Россия Премьер-лигасида ўйнаб, Москванинг “Локомотив” ва Қозоннинг “Рубин” клублари шарафини ҳимоя қилган.
Италия чемпионатининг жорий мавсумида Хвича 24 учрашувда 12 та гол урди ва 12 та голли узатмани амалга оширди. “Наполи” чемпионат якунланишига 10 тур қолганида 71 очко билан А Серия турнир жадвалида пешқадамлик қилмоқда ва энг яқин таъқибчиси “Лацио”дан 16 очко фарқ билан олдинда бормоқда.
“Transfermarkt” портали футболчининг нархини 85 миллион еврога баҳоламоқда.
