Alvares “Real Madrid”ga qarshi penalti vaqtida qoida buzganini inkor etdi (video)

“Atletiko”ning argentinalik hujumchisi Xulian Alvares Yevropa Chempionlar ligasi 1/8 finalining 2024/2025 yilgi mavsum javob uchrashuvida penaltilar seriyasi vaqtida tepgan to‘pi ikki marta oyog‘iga tegmaganini aytdi.

Forvard 11 metrlik masofadan to‘p tepish vaqtida sirpanib ketgan. To‘p darvozaga aniq yo‘naldi, biroq VAR xonasida hakamlar videotakrorni ko‘rib chiqib, bosh hakam Shimon Marsinyak bilan maslahatlashganidan so‘ng, argentinalik futbolchi to‘pga ikki marta tegib ketgani aniqlandi, bu esa qoida buzilishi sifatida baholanadi.

Shu tariqa, ikki o‘yindan iborat qarama-qarshilikdan so‘ng “Real Madrid” Yevropa Chempionlar ligasining chorak finaliga yo‘l oldi va endi jamoa chorak finalda Londonning “Arsenal” klubi bilan o‘ynaydi.

25 yoshli Alvares o‘tgan yozda “Manchester Siti”dan “matraschilar” safiga kelib qo‘shilgan edi. Joriy mavsumda argentinalik futbolchi barcha turnirlarda 43 ta o‘yinda maydonga tushib, 22 ta gol urdi va 5 ta golli uzatmani amalga oshirdi. “Transfermarkt” internet portaliga ko‘ra, futbolchining taxminiy bahosi 80 million yevroni tashkil qiladi.