Альварес “Реал Мадрид”га қарши пенальти вақтида қоида бузганини инкор этди (видео)

“Атлетико”нинг аргентиналик ҳужумчиси Хулиан Альварес Европа Чемпионлар лигаси 1/8 финалининг 2024/2025 йилги мавсум жавоб учрашувида пенальтилар серияси вақтида тепган тўпи икки марта оёғига тегмаганини айтди.

Форвард 11 метрлик масофадан тўп тепиш вақтида сирпаниб кетган. Тўп дарвозага аниқ йўналди, бироқ VAR хонасида ҳакамлар видеотакрорни кўриб чиқиб, бош ҳакам Шимон Марциняк билан маслаҳатлашганидан сўнг, аргентиналик футболчи тўпга икки марта тегиб кетгани аниқланди, бу эса қоида бузилиши сифатида баҳоланади.

Шу тариқа, икки ўйиндан иборат қарама-қаршиликдан сўнг “Реал Мадрид” Европа Чемпионлар лигасининг чорак финалига йўл олди ва энди жамоа чорак финалда Лондоннинг “Арсенал” клуби билан ўйнайди.

25 ёшли Альварес ўтган ёзда “Манчестер Сити”дан “матрасчилар” сафига келиб қўшилган эди. Жорий мавсумда аргентиналик футболчи барча турнирларда 43 та ўйинда майдонга тушиб, 22 та гол урди ва 5 та голли узатмани амалга оширди. “Transfermarkt” интернет порталига кўра, футболчининг тахминий баҳоси 80 миллион еврони ташкил қилади.