Alsgeymer alomatlarini yengillashtirish usuli aniqlandi

Massachusets texnologiya instituti olimlari 40 gers chastotada miya ritmlarini invazivsiz sensorli stimulyatsiya qilish, ya’ni tovushli vibratsiya orqali Alsgeymer kasalligining alomatlarini yengillashtirishi mumkinligini tadqiq qildi. Bu haqda “Frontiers in Aging Neuroscience” jurnalida chop etilgan maqolada aytiladi.

Miyaning 30 dan 120-170 gers oralig‘idagi ritmi gamma ritmi deb ataladi va maksimal e’tiborni talab qiladigan vazifalarni hal qilishda kuzatiladi. Yorug‘lik va tovush bilan gamma stimulyatsiyasi sichqonlar va odamlarda neyrodegenerativ kasallikning rivojlanishini kamaytirishi aniqlangan. Yangi tadqiqot shuni ko‘rsatdiki, bir necha hafta davomida har soatda 40 gers chastotali vibratsiya bu taktil stimulyatsiya uchun ham amal qiladi.

Tajriba davomida ikkita sichqoncha modeli qo‘llanilgan. Tebranishlarni hosil qilish uchun tadqiqotchilar 40 gers chastotada past ovoz chiqaradigan dinamiklar ustiga sichqoncha bor qafasni joylashtirgan. Barcha eksperimental kemiruvchilar bir xil tovushni eshitgan. Birinchi marta tebranish miya faoliyatiga ta’sir ko‘rsatishi, shuningdek, somatosensor po‘stlog‘ining faolligini ikki marta va motor korteksining faolligini uch barobar oshirishi isbotlangan.

Vibratsiya, shuningdek, miya salomatligi va motor funksiyasini yaxshilashi, shuningdek, Alsgeymer kasalligining asosiy belgisi bo‘lgan fosforlangan tau darajasini pasaytirishi, neyronlarning o‘limini va sinaptik aloqalarning yo‘qolishining oldini olishi va neyronlardagi DNK shikastlanishini kamaytirishi aniqlangan.