“Al-Nasr” yana bir top futbolchi bilan kelishuvga erishdi

Germaniyaning “Bavariya” klubi futbolchisi Sadio Mane Saudiyaning “Al-Nasr” jamoasiga o‘tishga rozilik bildirdi. Bu haqda “L'Equipe” xabar berdi.

Ma’lum qilinishicha, senegallik 31 yoshli hujumchi “Al-Nasr”ning taklifini qabul qilgan. Saudiya klubi Manega yiliga 25 million yevro maosh va’da qilgan, biroq “Bavariya” uning transferi uchun 32 million yevro va bonus olishni istamoqda. Shu bilan birga, Tomas Tuxel Mane bilan xayrlashishga tayyor.  “Transfermarkt” internet portaliga ko‘ra, futbolchining taxminiy narxi 25 million yevroni tashkil etadi.

Ma’lumot uchun, Mane 2022/2023 yilgi mavsumda “Bavariya” uchun barcha turnirlarda 38 o‘yinda maydonga tushib, 12 ta gol urgan va 6 ta golli uzatmaga mualliflik qilgan. Futbolchining Myunxen klubi bilan shartnomasi 2025 yil iyun oyining oxirigacha amal qiladi. Senegallik o‘z karerasida “Liverpul”, “Sautgempton” va “Zalsburg” klublari sharafini himoya qilgan.

Eslatib o‘tamiz, avvalroq Sadio Mane bitta gol urgan o‘rtoqlik o‘yinida “Bavariya” “Rottax-Egern”ni 27:0 ga mag‘lubiyatga uchratgan edi. Uchrashuv davomida Matis Tel va Jamal Musialalar 5 tadan gol urib, penta-trik qayd etgan bo‘lsa, Serj Gnabri raqib darvozasiga 3 ta to‘p kiritdi.