“Al-Nasr” “Inter”ga “hujum” qildi. Brozovich nishonda

Saudiya Arabistonining “Al-Nasr” klubi yarim himoyachi Marselo Brozovich uchun “Inter”ga yaxshigina taklif yubordi. Bu haqda insayder Janluka Di Marsio xabar berdi.

Unga ko‘ra, “Inter” xorvatiyalik futbolchining ketishiga qisman rozi. Chunki klubni “Sassuolo” yarim himoyachisi Davide Frattesini transfer qilish yo‘lida anchagina xarajat kutib turibdi.

Saudiyaliklar Brozovich uchun “Inter”ga 15 million yevro taklif qilgan. Ammo Milan klubi 30 yoshli xorvat bilan kamida 20-25 million yevro evaziga xayrlashish istagida.

Avvalroq ingliz klubi “Nyukasl” Brozovichga qiziqish bildirgani va futbolchining vakillari bilan bog‘langani haqida ham xabarlar tarqalgandi. 

Ma’lumot uchun, “qora-ko‘klar” safiga 2015 yilda Zagrebning “Dinamo”sidan ko‘chib o‘tgan xorvatiyalik o‘tgan mavsumda A Seriyada “Inter” safida 28 ta o‘yinda maydonga tushib, 3 ta gol urdi va 5 ta golli uzatmani amalga oshirdi.

Muhsinjon Umurzoqov