AQSHda samolyot mashinalarga urilib, ikkiga bo‘linib ketdi (video)

AQSHning Texas shtati Viktoriya shahrida kichik samolyot favqulodda yo‘lga qo‘nishi oqibatida uchta avtomobil bilan to‘qnashdi va ikkiga bo‘linib ketdi. Bu haqda politsiyaga tayanib, NBC News xabar berdi.

“Texas janubidagi ko‘chaga kichik samolyot qo‘nib, uchta mashinaga urilishi oqibatida to‘rt kishi yaralandi. Ular shifoxonaga yotqizildi. Voqea joyidan olingan suratlarda samolyot ikkiga bo‘linib ketganini ko‘rish mumkin”, deyiladi xabarda.

Qayd etilishicha, jabrlanuvchilarning uch nafari hayot uchun xavfli bo‘lmagan jarohatlar olgan, to‘rtinchisining jarohati esa og‘irroq.

Ma’lumotlarga ko‘ra, uchuvchi samolyotda yolg‘iz bo‘lgan. AQSH Federal aviatsiya boshqarmasi voqea yuzasidan tergov boshlagan.

Eslatib o‘tamiz, avvalroq Litva poytaxti Vilnyus shahrida yuk tashuvchi samolyot ikki qavatli turarjoy binosi ustiga qulab tushgan edi. Hodisa oqibatida bir kishi halok bo‘lgan, yana biri shifoxonaga yotqizilgan.