AQSH Ukrainaga 250 mln dollarlik harbiy yordam paketini e’lon qildi

AQSH Ukrainaga 250 million dollarlik yangi harbiy yordam paketini beradi. Bu haqda AQSH davlat kotibi Entoni Blinkenning Davlat departamenti saytida chop etilgan bayonotida aytiladi.

Yangi harbiy yordam paketiga HIMARS raketa tizimlari uchun snaryadlar, havo mudofaa tizimlari uchun AIM-9M raketalari, 155 mm va 105 mm artilleriya o‘q-dorilari kiritilgan.

Shuningdek, yordam paketdan quyidagilar joy olgan:

• minalardan tozalash vositalari;
• Javelin tankka qarshi raketa tizimlari;
• 3 milliondan ortiq patron;
• tez yordam mashinalari;
• ilgari taqdim etilgan uskunalarga texnik xizmat ko‘rsatish uchun ehtiyot qismlar.

Eslatib o‘tamiz, avvalroq AQSH ma’muriyati Ukrainaga yangi 200 million dollarlik harbiy yordam paketi jo‘natishini ma’lum qilgandi. Paketga AT-4, Tow va Javelin tankka qarshi raketa tizimlari, minalarni tozalash uskunalari, Patriot zenit-raketa tizimlari uchun o‘q-dorilar, GMLRS boshqariladigan raketalar, shuningdek, o‘q-dorilar kiradi.