AQSH Senati Isroilga qurol yetkazib berishni bloklamadi

Kecha, 20 noyabr kuni AQSH Senati ko‘pchilik ovoz bilan mamlakatning ayrim qurol tizimlarini Isroilga yetkazib berishni blokirovka qilish bo‘yicha uchta rezolyutsiyani rad etish uchun ovoz berdi. Bu haqda “The Hill” nashri xabar berdi.

Aniqlik kiritilishicha, rezolyutsiyalar tank qurollari va granatomyotlar uchun ba’zi o‘q-dorilar, shuningdek, bombalarni boshqarish moslamalariga tegishli. Hujjatlarning mualliflari AQSH Prezidenti Jo Baydenning Isroil va ularning ittifoqchisi, mustaqil senator Berni Sandersga nisbatan siyosatini ma’qullamaydigan demokratlar guruhi edi.

Nashrga ko‘ra, Sanders rezolyutsiyalar G‘azo sektori va Livandagi tinch aholiga qarshi halokatli oqibatlarga olib kelgan hujum qurollariga qarshi qaratilganini ta’kidlagan. Senatorning aytishicha, cheklovlar Isroilning hujumlardan o‘zini himoya qilish qobiliyatiga ta’sir qilmaydi, biroq uning takliflariga qarshi chiqqan qonunchilar bunga rozi emas.

Sandersga ko‘ra, “Xorijiy yordam to‘g‘risida”gi qonun va “Qurollarni nazorat qilish to‘g‘risida”gi qonunga ko‘ra, Qo‘shma Shtatlar xalqaro tan olingan inson huquqlarini buzgan yoki Amerika insonparvarlik yordami yetkazilishiga to‘sqinlik qilayotgan mamlakatlarga qurol yetkazib bera olmaydi. Senatorning fikricha, Isroil bu qonunbuzarliklarga yo‘l qo‘ymoqda.

O‘z navbatida, Senatdagi Demokratik partiya yetakchisi Chak Shumer Sandersning takliflarini tanqid qilgan.

Dpa nashrining yozishicha, AQSHning Isroilga qurol-yarog‘ yetkazib berishini blokirovka qilish to‘g‘risidagi rezolyutsiyalarni ovozga qo‘yishdan oldin ham, bu hujjatlarning muvaffaqiyat qozonish imkoniyati deyarli yo‘q edi.

Eslatib o‘tamiz, avvalroq AQSHning BMTdagi doimiy vakili o‘rinbosari Robert Vud Xavfsizlik Kengashida veto huquqidan foydalangan holda G‘azo sektorida doimiy va shartlarsiz o‘t ochishni to‘xtatishni talab qiluvchi rezolyutsiya loyihasini blokirovka qilganini bildirgandi. Xavfsizlik Kengashining 15 a’zosidan 14 tasi bu hujjatni qo‘llab-quvvatlagan. AQSH esa o‘tgan yilning oktyabr oyida Yaqin Sharq mojarosi avj olganidan beri G‘azo sektorida sulh to‘g‘risidagi qarorlarni beshinchi marta blokirovka qilmoqda. Rezolyutsiya loyihasi 10 ta doimiy bo‘lmagan BMT Xavfsizlik Kengashi a’zolari tomonidan tayyorlangan bo‘lib, u to‘qqizta banddan iborat.