AQSH Rossiyaga nisbatan yadroviy pozitsiyasini o‘zgartirmoqchi emas – Blinken

AQSH ma’muriyati hozirda Rossiya harakatlari tufayli o‘z strategik kuchlarining tayyorgarlik darajasini o‘zgartirish uchun hech qanday sabab ko‘rmayapti. Bu haqda AQSH Davlat kotibi Entoni Blinken “Bloomberg” agentligiga bergan intervyusida ma’lum qildi, uning stenogrammasi 26 oktyabr kuni AQSH TIV matbuot xizmati tomonidan tarqatildi. 

Blinkenning so‘zlariga ko‘ra, Vashington Rossiya tomonining yadroviy qurolga oid bayonotlaridan xavotirda.  

“Biz yadro qurolidan foydalanishga bo‘lgan munosabatimizni o‘zgartirish uchun hech qanday sabab ko‘rmadik, lekin biz buni diqqat bilan kuzatib boryapmiz va biz rossiyaliklarga, Prezident [Rossiya Vladimir] Putinga, agar biron bir yadro quroli qo‘llanilsa, qanday oqibatlarga olib kelishini to‘g‘ridan-to‘g‘ri va bir ma’noda aytdik”, deydi u. 

Blinkenning ta’kidlashicha, Rossiya tomonidan tarqatilayottgan Ukraina rasmiylarining “iflos bomba” yordamida provokatsiya qilishi mumkinligi haqidagi ma’lumotlar to‘liq uydirma. AQSH Davlat kotibining so‘zlariga ko‘ra, Rossiya tomoni go‘yoki o‘zi qilgan yoki qilmoqchi bo‘lgan ishlarda boshqalarni ayblagan. Blinkenning so‘zlariga ko‘ra, Qo‘shma Shtatlar Rossiya Federatsiyasini bu ogohlantirishlarni har qanday keskinlashuv uchun bahona sifatida ishlatishdan ogohlantirgan.

Joriy yilning 24 oktyabr kuni Rossiyaning Radiatsiya, kimyoviy va biologik mudofaa qo‘shinlari boshlig‘i Igor Kirillov brifingda Rossiya Federatsiyasi Mudofaa vazirligi o‘z kuchlari va vositalarini radioaktiv ifloslanish sharoitida harakatga tayyor holga keltirgani, chunki ularda Kiyevning "iflos bomba" dan foydalanishga tayyorligi to‘g‘risida ma’lumotlar borligini aytdi.

Rossiya Tashqi ishlar vaziri Sergey Lavrov ham “iflos bomba” tahdidi haqida gapirgan va bu masala Rossiya tomonidan BMT Xavfsizlik kengashi darajasida ko‘tarilgan. Avvalroq Rossiya Mudofaa vaziri Sergey Shoygu bir qator xorijlik hamkasblari, jumladan, Buyuk Britaniya, Turkiya va fransiyalik mavqedoshlari bilan telefon orqali muloqot qilib, ularni Ukrainadan kelayotgan bu tahdiddan ogohlantirgan edi. Bundan tashqari, u bu mamlakatdagi vaziyatni Pentagon rahbari Lloyd Ostin bilan muhokama qilgan. Vashington, London va Parij rasmiylari esa Moskvaning Kiyev tomonidan provokatsiya tayyorlanayotgani haqidagi ma’lumotlariga ishonmasliklarini aytishgan.