AQSH Netanyaxuni hibsga olishga order bergani uchun XJSga sanksiya kiritmoqchi

AQSH Kongressi Vakillar palatasi kecha, 9 yanvar kuni Isroil Bosh vaziri Binyamin Netanyaxu va uning sobiq mudofaa vaziri Yoav Galantni Isroilning G‘azo sektoridagi genotsidi tufayli hibsga olish uchun sud qaroriga norozilik sifatida Xalqaro jinoiy sudga (XJS) sanksiya qo‘yish uchun ovoz berdi. Bu haqda "Amerika ovozi" xabar berdi.

Sud a’zosi bo‘lmagan AQSH yoki ittifoqdosh mamlakatlar fuqarolarini, shu jumladan Isroilni tergov qilgan, hibsga olgan yoki jinoiy javobgarlikka tortadigan har qanday chet elliklarga nisbatan sanksiyalar qo‘llaydigan "Noqonuniy sud hokimiyatiga qarshi chiqish" qonunini 243 kongressmen yoqlab, 140 nafari esa qarshi ovoz berdi. 45 demokrat 198 respublikachiga qo‘shilib, qonun loyihasini qo‘llab-quvvatladi. Birorta ham respublikachi unga qarshi ovoz bermadi.

"Amerika bu qonunni qabul qilmoqda, chunki noqonuniy sud bizning buyuk ittifoqchimiz bo‘lmish Isroilning Bosh vazirini hibsga olishga urinmoqda", dedi respublikachilar vakili, Vakillar Palatasining Tashqi ishlar qo‘mitasi raisi Brayan Mast.

Vakillar palatasida o‘tgan haftada yangi Kongress tuzilganidan buyon birinchilardan bo‘lib o‘tkazilgan ovoz berish hozirda Kongressning har ikki palatasini nazorat qilayotgan  respublikachilar Isroil hukumatini kuchli qo‘llab-quvvatlashini ko‘rsatdi.

Prezidentlikka respublikachilardan nomzodi ko‘rsatilgan va saylangan Donald Tramp 20 yanvar kuni ikkinchi muddatga prezident sifatida qasamyod qiladi. Senatda yangi tayinlangan ko‘pchilik yetakchisi Jon Tun esa Tramp lavozimga kirishganidan so‘ng mazkur qonunni imzolashi uchun Senat orqali tezda o‘tishiga va’da berdi.

XJC xalqaro sud organi bo‘lib, u harbiy jinoyatlar, insoniyatga qarshi jinoyatlar, genotsid va a’zo davlatlar yoki ularning fuqarolariga qarshi harbiy tajovuz uchun shaxslarni javobgarlikka tortadi. Sudning ta’kidlashicha, Isroil rasmiylarini hibsga olish uchun order berish haqidagi qarori XJSning barcha ishlarga yondashuviga mos keladi, bu esa prokurorning dalillarning yetarliligiga bahosi va hibsga olish uchun order berish davom etayotgan jinoyatlarning oldini olishi mumkin degan fikrga asoslanadi.

Kongressdagi respublikachilar sud Netanyaxu va sobiq mudofaa vaziri Yoav Galantni G‘azodagi 15 oylik mojaro davomida urush jinoyatlari va insoniyatga qarshi jinoyatlarda ayblab, hibsga olishga order berganidan keyin XJSni qoraladi. Isroil esa ayblovlarni rad etadi.

Respublikachilar boshchiligidagi Vakillar palatasi qonun loyihasini iyun oyida qabul qilgan, ammo u hech qachon Demokratlar nazorati ostida bo‘lgan Senatga yetib bormagan.