AQSH minglab harbiylarini Janubiy Koreyadan olib chiqishi mumkin

AQSH Prezidenti Donald Tramp ma’muriyati Janubiy Koreyadan minglab AQSH harbiy xizmatchilarini olib chiqib, ularni Guam hamda Hind-Tinch okeani mintaqasidagi boshqa joylarga ko‘chirish imkonini ko‘rib chiqmoqda. Bu haqda amerikalik rasmiylarga tayanib, “The Wall Street Journal” nashri xabar berdi.

Nashrning yozishicha, Tramp ma’muriyati Janubiy Koreyadagi 28 ming 500 nafar AQSH Qurolli kuchlari tarkibidan taxminan 4500 nafar harbiy xizmatchini olib chiqish g‘oyasini muhokama qilmoqda. Bu qadam doimiy ravishda tahdid solayotgan Shimoliy Koreya sharoitida Janubiy Koreyada xavfsizlikka oid xavotirlarni kuchaytirishi mumkin.

Mudofaa rasmiylarining ta’kidlashicha, ushbu g‘oya AQSH Prezidenti ko‘rib chiqishi uchun tayyorlanmoqda va Pxenyanga nisbatan siyosatni qayta ko‘rib chiqishning norasmiy qismi sifatida qaralmoqda.

Ushbu g‘oya Tramp ma’muriyati AQSH harbiylarining Janubiy Koreyadagi joylashuvida “strategik egalik”ni oshirish, Xitoyning tajovuzkorlikka moyil siyosatiga qarshi turish va Janubiy Koreyani o‘z mudofaasi uchun ko‘proq mas’uliyatli bo‘lishga undash maqsadida qo‘shimcha choralar ko‘rishi mumkinligi haqidagi taxminlar fonida paydo bo‘lgan bo‘lishi mumkin.

Pentagon esa AQSH Qurolli kuchlarining Janubiy Koreyadagi sonini qisqartirish bo‘yicha hech qanday rasmiy bayonot mavjud emasligini ma’lum qilgan.

Eslatib o‘tamiz, mart oyida Amerika Qo‘shma Shtatlari Xitoy biqinida Filippin bilan “Salaknib and Balikatan” (SABAK) deb nomlangan yillik qo‘shma harbiy mashg‘ulotlar o‘tkazgan edi. Har yili o‘tkaziladigan SABAK mashg‘ulotlarining ushbu bosqichida Filippin armiyasidan 3000 ga yaqin va AQSH Tinch okeani armiyasidan (USARPAC) 2000 ga yaqin askar ishtirok etgan.

Jaloliddin Rahmonov