AQSH qiruvchi-bombardimonchi samolyotlarini Britaniya bazasiga o‘tkazadi 

Bu qishda AQSH beshinchi avlod F-35A qiruvchi-bombardimonchi samolyotlarining ikkita eskadrilyasini Buyuk Britaniya bazasiga o‘tkazadi. Bu haqda harbiy manbalariga tayanib, “The Daily Telegraph” nashri xabar berdi.

Qayd etilishicha, gap hozirda Suffolkda joylashgan AQSH F-15 samolyotlari kabi taktik yadro qurolini tashishga qodir 54 ta samolyot haqida ketmoqda. 

“F-35 samolyotlari shu yil oxirida yoki 2024 yilda ko‘chiriladi. Bular uzoq masofali va yashirin texnologiyaga ega yangi va imkoniyati ko‘proq samolyotlar”, deydi manba.

AQSHning F-35 samolyotlarini Yevropaga uzoq vaqtdan beri qayta joylashtirish rejalashtirilgani munosabati bilan gazeta AQSHning taktik yadroviy qurollari Buyuk Britaniyada ham qayta joylashtirilishi mumkinligi haqidagi so‘nggi xabarlarga e’tibor qaratgan.

Nashrning yozishicha, avvalroq Kongress AQSH Harbiy-havo kuchlaridan Pentagon haqiqatda Buyuk Britaniyadan ijaraga olgan Leykenxit bazasida 144 nafar amerikalik harbiy xizmatchi uchun qo‘shimcha uy-joy qurish uchun 50 million dollar ajratish bo‘yicha so‘rov olgan. Ushbu matnda ekspertlarning e’tibori ushbu harbiy xizmatchilarning potensial kafolat missiyasida ishtirok etishi haqidagi so‘zlarga qaratilgan. Kafillik atamasi Pentagon tomonidan yadroviy qurolni xavfsiz saqlash tamoyillariga ishora qilish uchun ishlatiladi.

Gazetaning eslatishicha, 2008 yilgacha Amerikaning 110 ta B61 yadro bombasi Leykenxit bazasida saqlangan, biroq xalqaro munosabatlardagi keskinlik pasaygan bir paytda ularni Britaniyada saqlash zarurati qolmagan.